Rusiye ordusı Hersonda hastahanege ücüm etti, dep bildirdi çeçek ayınıñ 14-nde vilâyet yolbaşçısı Aleksandr Prokudin.
Onıñ malümatına köre, "Molniya" tipindeki ücüm uçağı şeerniñ Merkeziy rayonındaki tibbiy müessiseni urdı.
"Ücüm neticesinde dört hastahane hadimi zarar kördi: 67 yaşında erkek ve 42, 51 ve 39 yaşında qadınlar. İlk evelâ olar patlav yaralarını aldılar", — dep yazdı Prokudin içtimaiy ağlarda.
O şunı da qoştı ki, zarar körgenlerge kerekli tibbiy yardım kösterile.
Daa evel Herson şeeriniñ arbiy memuriyeti bildirgenine köre, uçaq binanıñ damını urdı, pencereleri qırıldı.
Vilâyet akimiyetiniñ malümatına köre, keçken künü Herson vilâyetine Rusiye ücümleri neticesinde eki insan elâk oldı, 14 kişi yaralandı.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.