İyünniñ 10-na keçer gecesi Ava mudafaa quvetleri Odessa vilâyetinde Shahed kamikadze dronları ve eki raketanı tüşürdi. Dron parçaları çoq qatlı binağa tüşti, dairelerden birinde yanğın çıqtı, dep bildirdi vilâyetniñ arbiy memuriyet yolbaşçısı Serğiy Bratçuk.
Onıñ malümatına köre, üç insan elâk oldı, daa 26 kişi patlav dalğasından yaralandı. Yaralanğanlar arasında eki bala ve ağır ayaqlı qadın bar, dep bildirdi «Yug» operativ komandanlığınıñ spikeri Natalâ Ğumenük.
Daa bir raketa ücümi Odesa vilâyetiniñ yalısına yapıldı. Mesken yerler zarar kördi, üç kişi yaralandı.
Ukrayına Silâlı quvetleriniñ komandanlığı bildirgenine köre, Odesa vilâyetinden ğayrı uçucısızlar Harkiv ve Poltava vilâyetlerine ücüm etti. Umumen, arbiylerniñ malümatına köre, 20 dron tüşürildi.
Britaniya istihbaratı bildirgenine köre, 2023 senesi mayıs ayında Rusiye Ukrayınağa qarşı 300 Shahed İran uçucısızını qullandı – bugünge qadar bu silâ sistemasınıñ eñ çoq qullanıluvı oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.