Qırımdaki Rusiye FSB idaresiniñ hadimleri bildirgenine köre, semetdeşine Rusiye vatandaşlığını 10 biñ dollarğa yapmağa vade etken 27 yaşında Ukraina vatandaşı tutuldı. Qırım kütleviy haber vastalarınıñ FSB idaresiniñ matbuat hızmeti bergen malümatqa esaslanıp bildirgenine köre, erkek büyük miqdarda dolandırıcılıqta qabaatlana.
Haberde aytılğanına köre, yaqalanğan kişi Rusiye İç işler nazirliginiñ hadimi olmayıp, 49 yaşında Ukraina vatandaşına «qısqa müddet içinde» Rusiye vatandaşlığını resmiyleştirmege teklif etti.
Rusiye FSBsiniñ bildirgenine köre, yaqalanğan kişiniñ «ileride vadelerini yerine ketirmege» niyeti ve imkânları yoq edi.
Rusiye uquq qoruyıcıları cinaiy iş açtı, şübheli sayılğan kişi ev apsine alındı.
Rusiye FSBsiniñ haber etkenine köre, «qabaatlanğan insan qabaatını tanıdı ve tahqiqat ile işbirligi yapa».
Yaqalanğan kişiniñ izaatları yoq.
Rusiye uquq qoruyıcılarınıñ malümatını tasdıqlaycaq mustaqil menbalar yoq. Qırım.Aqiqat tafsilâtlı malümat almağa tırışa.