Çeçekniñ 27-ne keçer gecesi RF ordusı Odesağa ücüm etti. Yerli akimiyetniñ soñki malümatına köre, 13 insan, şu cümleden eki bala zarar kördi, dep bildirdi Odesa vilâyetiniñ arbiy memuriyetiniñ yolbaşçısı Oleğ Kiper.
Onıñ aytqanına köre, şeerniñ üç rayonında mesken evler ve infrastrukturanıñ obyektleri zarar kördi: musafirhane, funikulör, anbarlar. Bir çoq inşaatta camlar qırıldı, liman territoriyasında da zarar körildi.
Ukrayina Fevqulâde vaziyetler boyunca devlet hızmetinde bildirdiler ki, çoq qatlı evniñ urulması neticesinde daireler viran etildi, şahsiy ev ve daa bir çoq qatlı evniñ 15-inci qatındaki kvartira zarar kördi, arabalar ve yazlıq evler yandı.
"Qıyın gece edi. Duşman Odesanıñ mesken maalleri ve grajdan infrastrukturalarına kütleviy ücüm etti", — dep yazdı Odesa şeer arbiy memuriyetiniñ başı Serğiy Lısak.
Rusiye arbiyleri Çeçekniñ 27-nde saba Çerniğiv vilâyetindeki Korükovkağa da ücüm etti, eki insan yaralandı ve kritik infrastrukturağa zarar ketirildi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.