Rusiye Federatsiyasınıñ Krasnodar ülkesinde Tuapse deñiz limanı çeçek ayınıñ 20-nde uçucısızlarnıñ ücüminden soñ yanıp başladı, dep bildire yerli akimiyet vekilleri ve nezaret telekanalları.
"Bugün gece Tuapse daa bir kütleviy uçucısız ücümge oğradı. Neticede deñiz limanında, ilk malümatqa köre, bir adam elâk oldı. Qorantalarına teren taziyelerimni bildirem. Daa bir kişi yaralandı, oña bütün kerekli tibbiy yardım kösterile. Deñiz limanında yanğın çıqtı", — dep qayd etti Krasnodar ülkesiniñ gubernatorı Veniamin Kondratyev.
Astra telegram kanalı, gece ücüm neticesinde Tuapse cermay zavodınıñ rezervuar parkında büyük yanğın çıqqanını yaza, Exilenova+ telegram kanalı ise, saba yanğın daa devam ete edi dep bildire.
Ukrayinalı arbiyleri Tuapsedeki yañı ücüm aqqında daa bir şey aytmadı.
Çeçek ayınıñ 16-nda Tupase cermay zavodı ücüm altına endi oğrağan edi. Deñiz terminalı ile beraber bu zavod "Rosneft" terkibine kire. Şirketni Rusiye prezidenti Vladimir Putinniñ yaqın dostu ve ortağı İgor Seçin nezaret ete. Ukrayina 2025 senesi Saban, Boş ve İlk qıs aylarında Tuapse neft infrastrukturasına endi ücüm etken edi.
Ukrayinağa qarşı Rusiyeniñ keñ kölemlñ basuvı başlağan soñ Rusiyede ve işğal etken topraqlarında çeşit obyektler ava ücümlerine oğray. Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğalci ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.