Keçken künü devamında Rusiyeniñ atışları neticesinde Kostântınivka sakini elâk oldı, dep bildirdi dekabrniñ 26-nda Donetsk vilâyetiniñ reisi Vadim Filaşkin.
Onıñ malümatına köre, vilâyetniñ daa üç sakini yaralandı – ekisi Kostântınivkada ve bir kişi Drujkivkada.
Rusiyeniñ Herson vilâyetine açqan ateşi neticesinde kritik ve içtimaiy infrastruktura zarar kördi – mesken evler, hocalıq inşaatları, gaz boruları, köy hocalıq tehnikası, garaj ve maşinalar, dep bildirdi vilâyet yolbaşçısı Aleksandr Prokudin.
"Rusiye istilâsı sebebinden 1 insan elâk oldı, daa 6 kişi yaralandı", – dep ayttı o.
Rusiye ordusınıñ Zaporijjâ rayonına endirgen darbesi neticesinde bir kişi elâk oldı, daa dört insan yaralandı, dep bildirdi vilâyet yolbaşçısı İvan Fedorov.
Vilâyetniñ arbiy memuriyeti malümatına köre, Rusiye ordusı bir künde 29 mesken yerge 636 darbe endirdi. Vilâyetniñ memuriyeti mesken, maşina ve infrastruktura obyektleri zarar körgenine dair 26 haber aldı.
Bir künde Rusiye ordusı Harkiv vilâyetinde üç mesken yerge ücüm etti, dep bildirdi vilâyetniñ arbiy memuriyet yolbaşçısı Oleg Sinegubov.
"Kupânsk cemiyetiniñ Pristin köyünde ücüm neticesinde 63 yaşında adam yaralandı. Ekimler Kupânsk cemiyetiniñ Kovşarovka qasabasında yaralanğan 57 yaşında qadınğa da yardım kösterdi", – dep ayttı o.
Ücümler Kupânsk rayonınıñ Pristin köyünde mustaqil evge ve Lozovskıy rayonında kütüphane binasına ve elektrik hatlarına zarar ketirdi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.