Rusiyede ilk sefer Dağıstanğa dron ücüm etti, dep bildirdi cumhuriyet yolbaşçısı Sergey Melikov öz Telegram kanalında.
Onıñ aytqanına köre, saba Rusiyeniñ ava mudafaa küçleri Kaspiyskte uçucısıznı yoq etti. O, ücümniñ videosını içtimaiy ağlarda derc etmemege rica etti.
Kaspiysk şeeriniñ sakinleri ve yerli Telegram kanalları saba patlavlar ve silâ atışlarına beñzegen sesler aqqında haber ettiler. Kaspiyskten Ukrayinanıñ eñ yaqın şeerlerine qadar – biñ kilometrden ziyade bar.
«Astra» Telegram kanalınıñ malümatına köre, foto ve videolar dronlar Hazar deñiz flotunıñ flotiliyasınıñ bazasına ücüm etmege tırışqanlarını köstere. Açıq malümatqa köre, bu yerde yalı boyu askerleriniñ bölükleri, şu cümleden deñiz askerleri de yerleşe. Flotiliya Ukrayinağa ücüm etken edi, 177-nci deñiz polku ise Herson ve Zaporijjâ vilâyetlerindeki uruşlarda iştirak etti.
Aynı vaqıtta, Rusiyeniñ Mudafaa nazirligi bu aqta haber etmey, tek Kursk vilâyetinde, iddia etilgenine köre, Ukrayinanıñ eki uçucısızı, Orlov vilâyetinde ise bir uçaq yoq etilgenini iddia eteler.
Rusiyeniñ Ukrayinağa qarşı büyük ücümi başlanğanından berli Rusiye regionlarında muntazam sürette ateş ve dronlarnıñ ücümleri ola. Rusiyeniñ Mudafaa nazirligi Rusiyede tüşken raketalar ve dronlar aqqında haber ete. Kyiv umumen bu haberlerni izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.