Rusiyede Çelâbinsk vilâyetiniñ Kopeysk şeerinde zavodda patlav oldı, 10 kişi elâk oldı, dep haber etti vali Aleksey Teksler.
Onıñ malümatına köre, 5 kişi hastahanege alındı, alları stabil ağır, qıdıruv işleri devam ete. TASS Rusiye devlet haber agentligi acele hızmetlerniñ malümatına esaslanıp, yaralanğan 18 kişi aqqında yaza.
Valiniñ bildirgenine köre, patlav sebepleri ögrenile, amma uçucısızlarnıñ ücümi inkâr etile.
“Tahqiqat kete, facianıñ bütün tafsilâtları ögrenilecek. Daa bir kere qayd etmege isteyim – uçucısıznıñ ücümi aqqında laf ketmey”, – dep yazdı o, Telegramda.
Kopeysk şeer okrugında belediye fevqulâde vaziyet rejimi kirsetildi. Patlavdan soñ telükeli istisal obyektlerniñ sanayı telükesizligi talaplarını bozğanınen bağlı cinaiy dava açıldı.
Tahqiqat malümatına köre, 2025 senesi oktâbrniñ 22-nde aqşam “Kopeysk şeeriniñ sanayı müessiselerinden birinde tehnologik esnasta telükesizlik qaideleriniñ bozuluvı neticesinde patlav oldı”.
Resmiy şekilde haber etilmey, amma içtimaiy ağlarda laf Kopeyskte “Plastmass” arbiy zavodında olğan patlav aqqında kete, dep yazalar.
ASTRA Telegram kanalı qayd etkenine köre, “Plastmass” “Rosteh” devlet şirketiniñ AO “Tehnodinamika” holdingine ait. Zavod silâ parçalarını ve patlayıcı maddelerni yapa.