Rusiyeniñ Belgorod vilâyetinde sıñırdaki Krasnoyarujskiy rayonınıñ sakinleri daa «telükesiz yerlerge» tahliye etile, dep tarif etti yerli vali Vâçeslav Gladkov.
Onıñ aytqanına köre, bunıñ sebebi Ukrayina Silâlı quvetleriniñ rayon sıñırında faal olmasıdır.
«Telâşlı bir sabamız bar, Krasnoyarujskiy rayonınıñ sıñırında duşman faalleşti. Eminim, arbiylerimiz telükeni yoq etmek içün elinden kelgenini yapacaq. Amma Krasnoyarujskiy rayonında yaşağan ealimizniñ ayatı ve sağlığını qorumaq içün insanlarnıñ yerini deñiştiremiz», – dep haber etti Gladkov.
Rusiye valisi tarif etkenine köre, «Ukrayina Silâlı quvetleri bir künde Belgorod vilâyetindeki mesken yerlerge 40 kere ateş açtı, 42 uçucısız ücümi oldı». O, «yedi barışıqsever sakin yaralandı», dep bildire.
BBC Rusiye hızmeti qayd etkenine köre, Ukrayina bölüginiñ Krasnoyarujskiy rayonındaki Kolotilovka köyüne qarşı ücümi aqqında Rusiye blogerleri bazar künü, avgustnıñ 11-de, haber etken edi.
Muarririyet bu malümatnı mustaqil menbalarda teşkerip olamay.
Ukrayina akimiyeti Rusiyeniñ Belgorod vilâyetindeki vaziyetni daa izaatlamağan edi.
Krasnoyarujskiy rayonı Belgorod vilâyetiniñ şimaliy-ğarbinde buluna, Ukrayina Silâlı quvetleri avgustnıñ 6-nda kirgen Kursk vilâyetindeki Suca şeerinden tahminen 45 km mesafededir.
Rusiyeniñ Kursk vilâyetindeki adise-vaqialar Moskva 2022 senesi fevral ayında Ukrayinağa qarşı sebepsiz bir şekilde büyük istilâ başlatqanından berli Rusiye toprağına eñ büyük ücüm dep adlandırıla.
Avgustnıñ 10-na keçer gecesi Rusiye Kursk, Brânsk ve Belgorod vilâyetlerinde terror ile küreş tedbirleri başlatıldı, dep ilân etti.
Vaziyet kerginleşkeninden avgustnıñ 11-nde Rusiyeniñ ittifaqdaşı Beyazrusiye Ukrayina sıñırında tanklarını toplap başladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.