Aytışuvlar vaqtında Rusiye Ukrayinanıñ "denetsifikatsiyasını" artıq talap etmey ve Ukrayina bitaraf statusına saip olsa, memleketniñ Avropa Birligine qoşulması ile razıdır. Bunıñ aqqında dört menbağa atfı etip Financial Times neşri haber ete.
"Moskva ve Kıyiv, Ukrayinanıñ telükesizlik kefaleti qarşılığında NATO-ğa qoşuluvdan red etmesi ve Avropa Birligine qoşuluv imkânından ibaret olğan çatışmanıñ al etilüv variantlarnı muzakere eteler. Añlaşma leyhasında Rusiyeniñ birinci üç talabı şimdi yoq: silâdan arıtuv, denatsifikatsiya ve Ukrayinada rus tiliniñ qorunması", - dep haber ete neşir.
Ukrayina ve onıñ Ğarp ittifaqdaşları Rusiye przidenti Vladimir Putinniñ atışuvlarnı arbiy quvetlerini arttırmaq ve yañı ücümni azırlamaq içün "tütün perdesi" kibi qullana bileceginden saqınıp, onıñ niyetlerine şubenen yanaşalar.
Ukrayina aytışuv gruppasınıñ azası David Arahamiya Financial Times-ke, taraflar telükesizlik kefaletleri ve Ukrayinanıñ AB-ne qoşuluv imkânları ile bağlı bir añlaşmağa yaqın olğanlarını aytıp berdi. Onıñ fikrince, aytışuvlarda bir oñğanlıq olacağına pek muqaytlıqnen yanaşmaq kerek.
Taraflar muzakere etken añlaşma çerçivesinde Ukrayina özek silâsınınh işlenmesinden, öz topraqlarında çetel arbiy bazalarınıñ yerleştirilmesinden ve NATO azası olmaqtan red etmek kerek. Bunıñ yerine o, 11 memleket taarfından (Rusiye, Çin, ABD, Büyük Britaniya, Kanada, Frenkistan, Almaniya, İtaliya, Poloniya, Türkiye, İsrail) tasdıqlancaq telükesizlik kefaletlerini alacaq. Arahamiya bu kefaletlerni "NATO 5-nci maddesine yaqın" adlandıra. Oña köre, Alyansnıñ bütün azaları ittifaqçısına ücüm zamanı onı mudafaa etmek kerek.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.