Sentâbrniñ 2-nde saat 16:00-dan başlap ve sentâbrniñ 3-nde gece Rusiye Federatsiyasınıñ arbiyleri 526 ava ücüm vastasını qullanıp, Ukrayinağa ücüm etti, dep haber ete Ukrayina Silâlı quvetleri Ava küçleriniñ matbuat hızmeti. Ücümde iştirak etken darbe dronlarınıñ bir qısmı işğal etilgen Qırımda Çavda burnundan uçurıldı.
Ukrayina arbiyleri bildirgenine köre, Rusiye bularnı qullandı:
- Kursk, Brânsk, Millerovo, Orel, Şatalovo, Primorsko-Ahtarsk – Rusiye, Çavda – Qırım yönelişlerinden 502 darbe Shahed uçucısızı ve taqlit uçucısızı;
- Qara deñizden 16 «Kalibr» qanatlı raketası;
- Rusiyeniñ Saratov vilâyeti ve Krasnodar ülkesiniñ ava boşluğından 8 X-101 qanatlı raketası.
Ukrayina Silâlı quvetleri Ava küçleri bildirgenine köre, ava mudafaa quvetleri, uçucısız sistemalar ve Ukrayina Silâlı quvetleriniñ aviatsiyası 451 nişannı bastırıp oldı:
- 430 Shahed ve çeşit taqlit dronını;
- 14 «Kalibr» qanatlı raketası;
- 7 X-101 qanatlı raketası.
14 yerde 3 raketa ve 69 darbe uçucısızınıñ ücümi qayd etildi, parçalar 14 yerde tüşti.
Rusiye arbiyleri bir qaç künden berli Qırımdaki Çavda burnunı Ukrayinağa qarşı dronlarnı uçurmaq içün qullana. Bundan evel Aqmescitteki Sarabuz qasabası yanında Rusiye arbiy uçaq alanı sıq-sıq qullanılğan edi. Bu ücümni Rusiye Mudafaa nazirligi şimdilik daa izaatlamadı.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturasına ücüm etkenini, vatandaş ealisini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.