İşğal etilgen Qırım yaqınlarında Rusiye arbiyleri türkiye balıqçılarınen eki gemini yaqaladı. Bunı Milliyet Türkiye gazeti haber etmekte. Qayd etilgeni kibi, 12 balçqçı daa mayısnıñ 18-nde yaqalanğan, amma haber mediağa yalıñız keçken aftanıñ soñunda tüşken.
Balıqçılar Türkiyeden mayısnıñ 15-nde ketkenler. Mayısnıñ 18-nde, Qırım yalısına tahminen 50 deñiz milâsına yaqınlaşqan zaman Rusiye arbiy gemileri tarafından yaqalanğanlar.
Berilgen malümatqa köre, balıqçılar brakonyerliknen qabaatlanğan. Gemiler ve balıqçılarnı Aqyarğa alıp ketkenler.
CNN Türk balıqçılarğa 30 biñ dollar para cezası berilgenini, gemi ve tutulğan balıq ise musadere etilgenini bildire.
Balıqçılarnıñ soy-sopları Türkiye TİN ile bağlanğanlar, şimdi olarnıñ azat etilmesine dair muzakereler ketmekte.
Balıq avı birleşmesiniñ reisi Yaşar Sert balıqçılarnıñ brakonyerler olğanını tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.