Ukrayına Silâlı quvetleriniñ Baş komandanı Valeriy Zalujnıy 2022 senesi avgust ayında Qırımdaki Rusiye arbiy obyektlerine yapılğan raketa darbelerini tanıdı. Bu aqta «Ukrinform» içün «2023 arbiy kampaniyasını teminlev perspektivaları: Ukrayınanıñ baqışı» maqalesinde aytıla.
Zalujnıy ve halq deputatı Mıhaylo Zabrodskıynıñ maqalesinde «Ukrayına Silâlı quvetleriniñ vaqtınca işğal etilgen Qırım Muhtar Cumhuriyetine cenk areketleriniñ keçirilüvi» aqqında aytıla.
«Laf duşmannıñ Qırımdaki uçaq bazalarına kerçekleştirilgen raketa darbeleri aqqında kete, ilk evelâ – Saq uçaq alanı. Ukrayına Silâlı quvetleriniñ 2023 senesiniñ vazifesi – nişanlarğa olğan mesafege baqmadan, rusiyeliler içün diger işğal etilgen topraqlarda da bu islerni daa keskin, daa tabiiy ve daa yahşı is etilecek etmek», – dep aytıla maqalede.
Kyiv Qırımdaki Rusiye arbiy obyektlerine yapılğan ücümlerge alâqası olğanını ilk sefer tanıdı. Bundan evel Ukrayına akimiyeti ve arbiyleri Qırımdaki patlavlardan mesüliyetini tanımağan edi. Ukrayına Mudafaa nazirligi qırımlılarnı «eVoroğ» çat-botuna işğal etilgen Qırım yarımadasında Rusiye ordusınıñ bulunğan yerleri aqqında malümat bermege çağırğan edi.
Avgustnıñ 16-nda saba işğal etilgen Qırımnıñ Canköy rayonında patlavlar oldı. Silâ anbarları, transformator alt stantsiyasında patlavlar ve demir yolnıñ zarar körgeni aqqında haber etildi. Rusiye akimiyeti Canköy rayonınıñ Qalay köyünden 3 biñden çoq sakin tahliye etildi, dep bildirdi.
Rusiye Mudafaa nazirligi Qırımnıñ şimalinde olğanlarnı «diversiya» dep adlandırdı. Qırımda cinaiy iş açıldı. Şübheli ya da tutulğanlar aqqında malümat berilmey.
Qırımnıñ Rusiye yolbaşçısınıñ mesleatçısı Oleg Krüçkov Qırımdaki patlavlarnı «terakt» dep adlandırdı.
The New York Times neşri yüksek rutbeli Ukrayına memurına atfı etip, işğal etilgen Qırımnıñ Canköy civarındaki patlavlarğa «elit ukrayin bölüginiñ» alâqası bar, dep bildirdi. Neşirniñ qayd etkenine köre, memur adı gizli olğanını istegen.
Avgustnıñ 9-nda Saq rayonınıñ Novofedirivka qasabasınıñ arbiy uçaq alanında patlavlar oldı. Rusiye akimiyeti «yaqın evlerden» tahminen 30 kişi tahliye etildi, dep bildirdi. 60-tan çoq mesken ev zarar kördi.
Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Ukrayına akimiyeti ve arbiyleri Rusiye işğal etken Qırımdaki patlavlardan mesüliyetini tanımadı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.