Narkotik saqlağanında qabaatlanıp, dört yıl yaşav tarzı koloniyasında qalmasına üküm etilgen «Memorial» Rusiye aq qorçalayıcı merkeziniñ Groznıy bölük yolbaşçısı Oyub Titiyev iyünniñ 21-nde azatlıqqa çıqtı, dep bildire «RİA Novosti» Rusiye haber neşiri.
Titiyevni soy-sopları, zenaatdaşları ve dostları qarşılamağa keldi. Olar oña qoltutıp, aman-aman bütün mahkeme oturışuvlarına kele ediler, dep haber ete Azatlıq Radiosı.
Оюб Титиев на свободе! Смотрите сториз в нашем инстаграмеhttps://t.co/0ADZKuc2G6 pic.twitter.com/Fz8Ul3P4ta
— ПЦ Мемориал (@hrc_memorial) 21 июня 2019 г.
Aq qorçalayıcı faaliyetine qaytmaq niyeti barmı sualine Titiyev andan ketmegenini ayttı. Lâkin, Titiyevniñ bildirgenine köre, o, Çeçenistanda çalışmaycaq, çünki zenaatdaşlarını telükege oğratmağa istemey. Bir insanğa çalışmağa qıyın ola, insanlardan Çeçenistanda aq qorçalayıcı faaliyetinen oğraşmalarını rica etmek ise – telükelidir, dedi Titiyev.
Bundan evel mahkeme berilgen apis müddetinden üçte birini yatqan Titiyevni şartlı olaraq vaqtından evel azat etmege qarar aldı. Martnıñ 18-nde Çeçenistan mahkemesi Oyub Titiyevni narkotiklerni saqlav maddesi boyunca dört yıl yaşav tarzı koloniyasında qalmasına üküm etti.
Titiyev 2018 senesi yanvar ayınıñ başında tutuldı. Tahqiqat malümatına köre, maşinasında naşa tapıldı. Titiyev narkotik politsiya hadimleri tarafından gizliden qoyuldı, dep israr ete. Titiyevniñ zenaatdaşları onıñ davasını sahte sayıp, Çeçenistan akimiyetiniñ cumhuriyetteki aq qorçalayıcılarnı yoq etmek ıntıluvları aqqında bildire.
Halqara teşkilâtlar ve medeniyet erbapları Titiyevni qorumaq içün areket etti. Amnesty International, İnsan aqları halqara federatsiyası, Norveg Helsinki komiteti, Human Rights Watch ve Front Line Defenders yapqan beyanatlarında onı azat etmege talap etken ediler.
Çeçenistan yolbaşçısı Ramzan Kadırov cumhuriyetteki aq qorçalayıcılarnıñ faaliyetini sert bir şekilde tenqit etken edi. Advokatlar tahqiqat tarafından Titiyevge nisbeten ög munasebet olğanını red etmeyip, davanı federal seviyede baqmağa muracaat etti. Faqat o Çeçenistan Tahqiqat komitetine berilgen edi.