Rusiye Qırım ve Aqyar musulmanları diniy idaresiniñ reis muavini Raim Gafarof qırımtatarlarnıñ "vekiller toplaşuvı" vaqtında Rusiye prezidenti Vladimir Putinni ve Ukrayinadaki cenkni destekledi, dep haber ete QMDİ matbuat hızmeti.
Raim Gafarov Vladimir Putinge ve Ukrayina topraqlarında yaşağan qırımtatarlarğa Rusiyeniñ siyaseti desteklengen muracaatı qabul etilmezden evel dua oqudı.
"Keteyatqan mubarek Ramazan ayınıñ bu künlerinde Yüce Allahtan dualarımıznıñ ve yahşı amellerimizniñ qabul etilmesini isteyim. Qurultaynıñ işi hayır içün olsun. Emipizge tınçlıqta ve muabbetlikte tuvğan toprağımızda yaşamağa tileyim. Allah bizni belâlardan qorçalasın. Dualarımız Yüce Allahqa yönetilgen. Allahtan bütün hayırlı işlerimizge ve niyetlerimizge destek olmasını isteyim!", - dedi o.
Qırımda Rusiye kontrolindeki akimiyet FSBniñ yardımınen aprelniñ 30-nda qırımtatarlarnıñ «vekiller toplaşuvını» ötkermege istey. Bu aqta Qırımtatar Milliy Meclisiniñ reisi Refat Çubarov Facebook saifesinde bildirdi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.