Rusiye akimiyeti Oraqnıñ 22-nde gece Yaltadaki çoq qatlı binağa dron urulğanı aqqında bildirdi
Qırımnıñ Rusiye yolbaşçısınıñ mesleatçısı Oleg Krüçkovnıñ bildirgenine köre, vaqia neticesinde 17 insan yaralandı, altısı hastahanege alındı.
Rusiyeniñ Qırım boyunca fevqulâde vaziyetler nazirliginiñ beyanatına köre, 350 adam tahliye etildi, binada peyda olğan yanğın dört saat içinde söndürildi, yedi daire yandı, fasadnıñ bir qısmı yıqıldı.
Endi bütün qaza-qurtaruv areketleri yekünlendi, dep bildirdi Yalta memuriyetiniñ baş muavini Sergey Olefirenko.
Rusiye akimiyeti tarafından seslendirilgen bütün malümat qoşma tasdıq ve tafsilâtqa muhtac. Ukrayina tarafı bu adiseni daa izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.