Gece dronlar "Kavkaz" limanında paromğa ücüm etti, ekipaj arasında yaralanğanlar bar, bir kişi elâk oldı. Bu aqta Krasnodar ülkesiniñ gubernatorı Veniamin Kondratyev öz telegram-kanalında bildirdi.
"Bugün saba uçucısız uçaqlar "Kavkaz" limanında parom gemisine ücüm etti. (...) Yanğın lokal, ateş tarqaluv telükesi yoq. Ne yazıq ki, ekipaj azaları ve liman hadimleri arasında zarar körgenler ve elâk olğanlar bar", — dep yazdı Kondratyev.
Vaqia yerinde fevqulâde vaziyetler hızmeti çalışa.
Ukraina akimiyeti paromğa ücüm etilgenini aqqında haberni izaatlamadı.
"Kavkaz" limanı Keriçten 15 kilometr mesafede buluna ve Keriç boğazı boyunca parom vastasınen Rusiye Federatsiyasınıñ territoriyasını Qırım ile bağlay. Anda ihracat neftini taşuv içün yük terminalı yerleşken. Mayısnıñ soñunda, arbiy quvetlerniñ bu limanda yerleşken neft terminalına ücüm etkenleri aqqında haber etilgen edi.
Rusiye Mudafaa nazirligi, ava mudafaası vastaları bir gecede 25 ukrayin uçucısız uçağını toqtatıp yoq etkenini bildire. Müessiseniñ malümatına köre, uçaqlarnıñ çoqusı işğal etilgen Qırım ve Qara deñiz üzerinde urıp tüşürildi, daa ekişer uçaq Belgorod ve Brânsk vilâyetlerinde urıp tüşürildi. Zarar körgenler aqqında haber etilmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.