Mariupol şeer yolbaşçısınıñ mesleatçısı Petro Andrüşçenko, Rusiye akimiyeti Keriç köpründen keçüv qaidelerini sertleştirdi, dep bildirdi.
Yani, köpürden tahminen 10 km uzaqlıqta GPS-ni bozıp, REB çalışıp başlay. Memurnıñ aytqanına köre, navigator maşnanıñ areket suratınen bağlı yañlış malümat köstere, bazı yerlerde signal ğayıp ola ya da kâinatnıñ diger qısmında koordinatlarnı bere.
Bundan da ğayrı, arabalar, sıñırdan keçkende olğanı kibi, teşkerilmek kerek. Eki variant bar: skaner ve el teşkerüvi.
Köpür ögünde el teşkerüvi vaqtında çantalarnı çıqarıp, teşkerüv odasına ketirmek, er şeyni şeritke qoymaq kerek. Maşinanı da bütünley teşkereler: bardak, yedek bölügi, oturacaq.
Skanerde baqılğan şeyler, iddia etilgenine köre, "Baqıldı" etiketi ile qayd etile. Aydavcığa mavı, yolcularğa qırmızı kart berile.
Keriç köprü Rusiye territoriyasından işğal etilgen Qırımğa esas naqliyatnı temin ete. Rusiye Federatsiyasınıñ Ukrayinağa tam miqyaslı istilâsı şaraitlerinde bu yönelişte vatandaş aviatsiya alâqaları qapatıldı. Onıñ içün köprüde eki qat yük bar edi. Adet üzre, o, yaz ve baar aylarında arta.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.