2022 senesi kiçik aynıñ 24-nden başlap Rusiye Federatsiyası tarafından ilhaq etilgen Qırım ve Herson vilâyetiniñ işğal etilgen rayonlarında Noman Çelebicihan adına qırımtatar batalyonında iştirak etüvde qabaatlanğan 70 Ukrayina vatandaşı tutuldı. Bu aqta Qırımtatar resurs merkezi haber ete .
QRM-niñ malümatına köre, 21 insan Qırımda, 49 kişi Herson vilâyetiniñ işğal etilgen qısmında apiske alındı.
Qırımtatar resurs merkeziniñ idare yolbaşçısı Eskender Bariyev Noman Çelebicihan batalyonında iştirak etkeninde qabaatlanıp mahküm etilgen eki ağa-qardaş Vladimir ve Aleksey Settarovlarnıñ taqip etilüvi aqqında tarif etti.
Onıñ aytqanına köre, Aleksey Settarov (24 yaşında) 2023 senesi orta küz ayınıñ 23-nde beş yıl sert rejimli koloniyada qalmasına üküm etildi.
Onıñ kiçik qardaşı Vladimir Settarovğa (22 yaşında) 2023 senesi boş aynıñ 22-nde beş buçuq yıl sert rejimli koloniyada apis cezası berildi, o da apishanede bir yıl ve azat etilgen soñ bir yıl memuriy nezaret altında qalacaq.
Bariyevniñ aytqanına köre, FSB, beş kün devamında tuvğanlarına bulunğan yeri aqqında haber bermeyip, qardaşlarnı tarlalarda çalışqanda yaqaladı.
"Menimce, dünyanıñ iç bir medeniy memleketinde, mahkeme ve tahqiqatsız bir insannıñ apiske alınğan künü terrorist ve ekstremistler cedveline kirsetilgeni kibi bir şey yoq. Amma Rusiyede tamam böyle ola", — dep qayd etti aq qoruyıcı.