Rusiye kontrolindeki Aqyar yolbaşçısı boş aynıñ 14-nde gece şeerge 16 dron ücüm etti, dep bildirdi. Bu aqta o, içtimaiy ağlardaki saifelerinde bildirdi.
Umumen ava mudafaa quvetleri ve Qara deñiz flotunıñ 16 pilotsız uçağı urulıp tüşürildi. Aqyar qurtaruv hızmetiniñ malümatına köre, şeerdeki iç bir obyekt zarar körmedi, dep yazdı Razvojayev.
Rusiye Mudafaa nazirligi, Rusiye ava mudafaası Qırım üzerinde 19 ve Qara deñizde 59 dronnı yoq etkenini iddia ete.
Cenk şaraitlerinde bildirilgen malümatnı mustaqil menbalar vastasınen tasdıqlamaq imkânsızdır.
Ukrayina arbiyleri ücümni şimdilik izaatlamadı.
Boş aynıñ 13-nde aqşam ve boş aynıñ 14-ne keçken gecesi Aqyarda ava telükesi ilân etilgen edi. Yerli telegram kanallarında patlavğa oşağan sesler aqqında yazılğan edi. "Krımskiy veter" haber etkenine köre, Cenübiy körfez ve Belbek Rusiye ava limanı civarında patlavlar oldı.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.