Kremlde, Rusiye prezidenti Vladimir Putinniñ Romaniyada Galats şeerindeki mesken evge tüşken uçaqnıñ parçaları Moskvağa berilse, "obyektiv tahqiqat" keçirmege azır olğanı aqqında aytqanlarına Romaniyadan iç bir cevap almadılar. Bu aqta TASS Putinniñ matbuat kâtibi Dmitriy Peskovğa atıf eterek bildire.
Quralaynıñ 29-na keçer gecesi Romaniyada bir evniñ içine uçaq tüşti, eki insan yaralandı. Romaniya akimiyeti bildirgenine köre, o gece Odesa vilâyetinde uçurılğan onlarnen uçucısızlardan biri Rusiye uçağı edi.
Putin Quralaynıñ 29-nda Astanada matbuat konferensiyasında, uçucısız uçaq Ukrayina uçağı ola bile, dep tahmin etip, buña şübhe bildirdi.
Bazar künü Romaniya prezidenti Nikuşor Dan, uçucısız uçaqnıñ parçalarını teşkerüv malümatına atıf eterek, mütehassıslar söz Rusiyeniñ "Geran-2" pilotsız uçağı aqqında ketkenine yekün çıqarğanını yazdı.
Dannıñ aytqanına köre, tehnikiy ekspertiza endi azır. Romaniya prezidenti öz dercini fotolarnen temin etti, o, parça üstünde "Gerân-2" yazısı olğanını qayd etti, bu tipte uçaq olğanını diger parçalarnıñ tehnikiy talili köstere. Putinniñ beyanatını izaatlamadı.
Romaniya Mudafaa nazirligi, Rusiyeniñ Ukrayinağa ücüm etkeninde uçaq Romaniya ava boşluğına kirgenini tasdıqladı. Aynı zamanda müessise, onıñ ukrayin ava mudafaası sisteması tarafından tüşürilgenini tasdıqlamadı.