Riza Ömerovnıñ aytqanına köre, közlerinde bir perde ola ve qara noqtalar körip başlay. Qırımtatarı köz ekimine muracaat etmedi, amma «ekim onı baqsın istey». Bundan ğayrı, Ömerovlar qorantası Rizağa koloniyağa kelgen tiş ekimine 54 biñ Rusiye rublesini sarf etti.
Siyasiy mabüs teninde peyda olğan beyaz lekeler aqqında ayttı. Sebebi avitaminoz ola bile, dep ayta, çünki «aşlar pek yaramay».
«Tükânda meyva satılmay. Üç ayda bir kere 20 kilogrammlıq yollanma ola bile. Bu üç künge men 25 kilogramm ketirdim, ve bir şey qalmadı dep aytmaq mümkün. Tükândan esasen qurabiye, qanfet, ev himiyasını ala», – dep qayd etti Sevilâ Ömerova.
O, beş yılda aqayı «pek deñişti», amma «ruhtan tüşmey», dep qoştı. Şimdi tikiş tsehinde çalışa.
Bu uzun körüşüv Ömerovlarnıñ balaları içün birinci oldı, beş yıldan soñ babalarını körip olğanlar.
«Ketecek künü balalar bütün kün ağladı. Riza balalar öse, amma olarğa terbiye berip olamay, baba terbiyesini körmeyler, Quran ögretip olamay dep yazıqsındı. Cemaatqa selâm ayttı ve siyasiy mabüslerniñ evlerine qaytmasını bekley», – dep qoştı Riza Ömerovnıñ ömür arqadaşı.
Ömerovlar baba ve oğul 2019 senesi iyünniñ 10-nda tutuldı. Qırımtatarlar Rusiyede 2003 senesinden berli yasaq etilgen «Hizb ut-Tahrir» siyasiy islâm firqasınıñ faaliyetinde iştirak etkeninde ve teşkil etkeninde qabaatlana.
2020 senesi yanvarniñ 12-nde Rostov-na-Donu Cenübiy okrugınıñ arbiy mahkemesi Enver Ömerovnı 18 yılğa, Ayder Cepparovnı 17 yılğa, Riza Ömerovnı 13 yılğa üküm etti. Advokatlar ükümge qarşı istinaf şikâyetini berdi. 2022 senesi martnıñ 10-nda istinaf mahkemesi birinci instantsiya qararını tasdıqladı.
2019 senesi iyülniñ 18-nde Avropa parlamenti Rusiyeni bütün ukrayinalı siyasiy mabüslerni, şu cümleden bu cinaiy davanıñ mabüslerini azat etmege çağıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.