13 yılğa üküm etilgen «Qarasuvbazar gruppasınıñ» mabüsi közleri yaramay körgenini ve bedende belli olmağan lekeler bar, dep şikâyet etti. Bu aqta «Qırım birdemligine» apayı Sevilâ Ömerova haber etti.
Qadınnıñ aytqanına köre, Ömerov sol közünen yaramay köre, ögünde çizgiler köre. Qırımtatarını köz ekimi baqtı. Damarlarnen bağlı bir mesele bar, dep ayttı.
Ömerovğa ekimler közleri içün bir tedaviylev yazğan ediler, amma o, semereli olmadı, dep ayta qırımlınıñ ömür arqadaşı. Ekimler erkek endi qullanğan melemni yazdı, ve oña yardım etmedi.
Ömerovanıñ aytqanına köre, diagnoz qoymaq ve tedaviylevini belgilemek içün aqayına daa professional tibbiy teşkerüv kerek.
Qadınnıñ qayd etkenine köre, Riza Ömerov pek azdı, teri tüsü yaramay. Qırımlınıñ alını ömür arqadaşı koloniyada yaramay aşağanınen bağlay.
Ömerovlar baba ve oğul 2019 senesi iyünniñ 10-nda tutuldı. Qırımtatarlar Rusiyede 2003 senesinden berli yasaq etilgen «Hizb ut-Tahrir» siyasiy islâm firqasınıñ faaliyetinde iştirak etkeninde ve teşkil etkeninde qabaatlana.
2020 senesi yanvarniñ 12-nde Rostov-na-Donu Cenübiy okrugınıñ arbiy mahkemesi Enver Ömerovnı 18 yılğa, Ayder Cepparovnı 17 yılğa, Riza Ömerovnı 13 yılğa üküm etti. Advokatlar ükümge qarşı istinaf şikâyetini berdi. 2022 senesi martnıñ 10-nda istinaf mahkemesi birinci instantsiya qararını tasdıqladı.
2019 senesi iyülniñ 18-nde Avropa parlamenti Rusiyeni bütün ukrayinalı siyasiy mabüslerni, şu cümleden bu cinaiy davanıñ mabüslerini azat etmege çağıra.