Zaporojjâğa Rusiye ücüminiñ neticesinde zarar körgenlerniñ sayısı 30 insanğa qadar arttı, olarnıñ arasında altı bala bar, dep bildirdi Zaporijjâ vilâyetiniñ arbiy memuriyetiniñ yolbaşçısı Mihail Semikin.
Daa evel 13 yaralanğan kişi aqqında belli edi.
Onıñ aytqanına köre, ücüm yerinde qurtaruv-qıdıruv işleri yekünlendi.
Bugün kündüz Rusiye quvetçileri Zaporijjânıñ Kosmik rayonında beş qatlı mesken evge ücüm etti. OVA malümatına köre, ücüm neticesinde üçünci qattaki daireler zarar kördi. Ekinci ve üçünci qatlardaki dairelerde yanğın çıqtı, azbarda arabalar da yandı.
Daa evel yerli akimiyet, Zaporojjânıñ Kosmik rayonında Rusiyeniñ sanayı obyektine ücümi neticesinde viraneler altında qalğan erkekniñ ölümi aqqında haber etken edi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.