Armannıñ 27-ne keçer gecesi Rusiye arbiyleri Ukrayinağa Qırımdan eki "Oniks" gemige qarşı raketa, Rusiyeden "İskander-M"/KN-23 ballistik raketalar, Rusiyeniñ dört yerinden, ilhaq etilgen Donetsk ve Qırımdan 258 uçucısız uçaq ile ücüm etti, dep bildire Ukrayina Arbiy ava quvetleri.
Ukrayina arbiyleriniñ aytqanına köre, ücümniñ esas yönelişleri Odesa, Kıyiv, Dnipropetrovsk, Poltava ve Zaporijjâ edi.
"İlk malümatqa köre, saat 09:00-da ava mudafaası tarafından memleketniñ cenübinde, şimalinde, şarqında ve merkezinde gemige qarşı "Oniks" raketası, İskander-M/KN-23 yedi ballistik raketası, üç S8000 Banderol, 222 "Şahed", "Gerbera" ve diger tiplerdeki dronlar urulıp tüşürilgen. Bundan ğayrı, bazı duşman silâsı öz maqsadına irişmedi, olar aqqında malümat alına", — dep aytıla haberde.
Ukrayina arbiy ava quvetleri bildirgenine köre, ücüm neticesinde 15 yerde uruluv qayd etilgen, 11 yerge parçalar tüşken.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.