Refat Çubarov 64 yaşında. Milliy Meclis reisiniñ ayatından müim fotoresimler
Refat Çubarov Qırımtatar Milliy Meclisiniñ yañı reisi olaraq saylana, Aqmescit, 2013 senesi oktâbrniñ 28-i. Qurultayda onıñ namzetine 126 delegat rey berdi, 114-ü Remzi İlyasovğa qoltuttı. Yıllar devamında Meclis reisi olğan Mustafa Cemilev namzetini köstermege razı olmadı, amma yañı Meclis reisine yardım etecek, dep ayttı
Refat Çubarov Qırımtatar Milliy Meclisi tarafından çağırılğan ve 2014 senesi fevralniñ 26-nda saba saat 11-de Aqmescitteki Qırım parlamentiniñ binası ögünde keçirilgen separatizmge qarşı miting vaqtında. Aktsiya «Ukraina topraq bütünligini saqlap ve Qırım Muhtar Cumhuriyeti Yuqarı Radasına muhtariyette vaziyetni kerginleştirecek qararlarnı qabul etmesine izin bermemek» şiarınen keçirilgen edi.
Qırım Yuqarı Şurası ögünde, farqlı malümatlarğa köre, 5 biñden 10 biñge qadar qırımtatarı ve olıp keçkenlerge qarşı çıqqan diger milletler çıqtı.
Qırım parlamenti ögündeki miting tarihtı qırımlılarnıñ Rusiye işğaline qarşı tirenüv başlanğıçı olaraq qaldı. 2016 senesinden başlap fevralniñ 26-sı Ukrainada «Qırımnıñ Rusiye işğaline qarşı tirenüv künü» olaraq resmiy künler taqviminde bar.
Refat Çubarov Aqmescitteki cami kirişinde çıqışta buluna, 2014 senesi martnıñ 7-si
Refat Çubarov dünyanıñ çoqusı memleketi tarafından tanılmağan yarımada statusı aqqında «referendumdan» soñ ertesi künü keçirilgen matbuat konferentsiyasında, 2014 senesi martnıñ 17-si.
Ukraina, Avropa Birligi, ABD «referendumda» rey berüv neticelerini tanımadı. Rusiye prezidenti Vladimir Putin 2014 senesi martnıñ 18-nde Qırımnıñ Rusiyege «qoşuluvı» aqqında ilân etti. Halqara teşkilâtlar Qırım işğali ve ilhaqını qanunsız tapıp, Rusiye areketlerini takbih etti. Ğarp memleketleri iqtisadiy sanktsiyalar kirsetti
Qırımtatar Milliy Meclisiniñ reisi Refat Çubarov Bağçasarayda Qırımtatar Milliy Qurultayınıñ nevbetten tış sessiyasında çıqışta bulunğanda, 2014 senesi martnıñ 29-ı.
Qırımtatar Milliy Qurultayı, qırımtatar halqınıñ tarihiy vatanı Qırımda milliy-territorial muhtariyetini ğayrıdan tiklevnen bağlı siyasiy ve uquqiy tedbirlerni başlatqanı aqqında ilân etti. Qararlar qabul etildi. Buña delegatlarnıñ ekseriyeti qoltuttı. 212 delegat rey berdi, 4 delegat qarşı çıqtı, 1 delegat bitaraf qaldı
Refat Çubarov ve bir qaç biñ qırımtatarı Mustafa Cemilevni Ermeni Bazarda qarşılay, 2014 senesi mayısnıñ 3-ü
Meclis reisi Refat Çubarov Aqmescitte qırımtatar sürgünliginiñ yılı munasebetinen matem mitinginde, 2014 senesi mayısnıñ 18-i. Kreml kontrolindeki Qırım akimiyetiniñ yasaqları sebebinden insanlar şeerniñ merkezinde degil, Aq-Meçet rayonında toplaştı
2015 senesi avgustnıñ 1-2-nde Türkiyeniñ paytahtı Ankarada II Dünya qırımtatar kongressi keçirildi. Rusiye mahsus hızmetelri qırımtatar faallerini taqip etkeni içün kongress yarımadada ötkerilemedi.
Fotoresimde – prezidium azaları Ali Özenbaş (soldan) ve Refat Çubarov
Dünya qırımtatar kongressiniñ prezidenti olaraq Refat Çubarov ğayrıdan saylandı
Qırımnıñ «aşayt qamaçavınıñ» başlanğıçına bağışlanğan «Çonğar» keçiş noqtasındaki miting, 2015 senesi sentâbrniñ 20-si
Qırımtatar halqınıñ lideri Mustafa Cemilev, Ukraina televideniye ve radio milliy şurasınıñ sabıq azası (o vaqıt – Ukraina informatsion siyaseti naziriniñ mesleatçısı) Serğiy Kostınskıy, qırımtatar oyuncısı ve rejissör Ahtem Seitablayev ve Qırımtatar Milliy Meclisiniñ reisi Refat Çubarov qırımtatar uçujeısı Amet-Han Sultannıñ doğğanından 95 yıl keçkeni munasebetinen abidesine çeçekler qoya. Şan-şüret parkı, Kyiv, 2015 senesi oktâbrniñ 25-i
Kyivdeki aktsiya. 2015 senesi noyabrniñ 6-nda Kyivdeki Rusiye elçihanesi ögünde Qırımdaki Rusiye akimiyetiniñ qırımtatarlarğa ve Ukraina vatandaşlarına qarşı yapqan basqısına qarşı narazılıq aktsiyası ötkerildi. Faaller Qırım meselesi çezilsin dep talap etti, vaqianıñ merkezi ise «Qorqu yarımadası» fleşmobı oldı.
Qırımtatar Milliy Meclisiniñ reisi Refat Çubarov Rusiye prezidenti Vladimir Putinni Gitlernen qıyasladı: «Bugünki Gitler, onıñ ambitsiyaları sıñırsız, ve bu ambitsiyalarnı insanlarğa basqı yapıp kerçekleştirmege tırışa»
Refat Çubarov Qırımtatar Milliy Meclisiniñ kupı içün arqadaşlıq futbol matçında ğalebe qazanğanlarğa ğanimet bere, Kyiv, 2016 senesi fevralniñ 13-ü
Kupnı «Qırım» taqımı qazanğan edi. Taqım 2015 senesi noyabr ayında Qırımda keçirilgen Amet-Han Sultan turniri esasında toplanğan edi
Matçta Meclis azaları, milliy areket faalleri, hususan Sinaver Kadırov, Eskender Bariyev bar ediler
Pragada, «CrimeanSOS» festivali çerçivesinde, qırımlı siyasiy mabüslerge qoltutuv ve Qırım işğaline qarşı yürüş mitingi keçirildi, 2016 senesi martnıñ 19-ı
«Çonğar» keçiş noqtasında Qırımnıñ «vatandaş qamaçavınıñ» yılı, 2016 senesi sentâbrniñ 24-ü
Refat Çubarov Kyivde Qırımtatar Milliy Meclisine qoltutuv aktsiyasında, 2016 senesi sentâbrniñ 29-ı. O künü Moskvadaki Rusiye Yuqarı mahkemesi Rusiyede Meclis yasağı qararına qarşı istinafnı red etken edi.
2016 senesi aprelniñ 26-nda Kreml kontrolindeki Qırım Yuqarı mahkemesi Qırımtatar Milliy Meclisini yasaqladı. Daa soñra Rusiye Yuqarı mahkemesi bu qararnı pekitip, qırımtatarlarnıñ temsiliy organını ekstremist teşkilât dep ilân etti.
2017 senesi aprel ayında BM Halqara mahkemesi Ukraina Rusiyege qarşı davası çerçivesinde Rusiyeden Meclis yasağını lâğu etmesini talap etti, lâkin Moskva bu talabını yerine ketirmedi
O vaqıt Ukraina halq deputatı olğan Refat Çubarov «Qırımnıñ Rusiye işğaline qarşı tirenüv künü» munasebetinen keçirilgen yürüşte, Kyiv, 2017 senesi fevralniñ 26-sı
Kyivde Qırımtatar bayraq künü munasebetinen tantanalı yürüş, 2017 senesi iyünniñ 26-sı. 40 metrlik altın tamğalı mavı bayraq şeerniñ eki merkeziy soqaqnıñ çaprazında açıldı ve Mustaqillik Meydanına qadar taşıldı.
Qırımtatar bayraq künü olaraq Ekinci Qırımtatar Milliy Qurultayı toplaşqan 1991 senesi iyünniñ 26-27-siniñ birinci künü saylandı
Refat Çubarov reisliginde Qırımtatar Milliy Meclisi Qırımda siyasiy mabüslerniñ para cezalarını ödemek içün «onlar» aktsiyasına qoşuldı, 2017 senesi avgust ayı.
2017 senesi iyülniñ 31-nde Qırımda «Qırım birdemligi» cemaat birleşmesi siyasiy mabüslerge ve vatandaş faallerpine qoltutmaq maqsadınen «Qırım marafonını» ilân etti. Avgustnıñ 22-ne qadar faaller kerekli qadar para topladı – 820 biñ ruble (tahminen 352 biñ ğrıvnâ).
Aktsiyada «lâqayt qalmağanlarnıñ birligini» köstermek içün 10 rublelik kapikler (tahminen 4 ğrıvnâ ola) toplandı. Çoq biñli para cezalarından birini tölemek içün 140 kilogramm maden ya da 25 biñ 10 rublelik kapik toplandı
Qırımtatar Milliy Meclisiniñ reis muavini Ahtem Çiygozğa qoltutuv aktsiyası, Kyiv, 2017 senesi sentâbrniñ 13-ü.
2015 senesi Rusiye quvetçileri Qırımtatar Milliy Meclisiniñ reis muavini Ahtem Çiygoznı tutıp, onı 2014 senesi fevralniñ 26-nda Qırım parlamenti ögünde «qalabalıqlarnı» teşkil etkeninde qabaatladı. Daa soñra Qırımdaki Rusiye mahkemesi onı sekiz yıl sert rejimli koloniyada qalmasına üküm etti. 2017 senesi oktâbr ayında Çiygoz azat etildi, şimdi Kyivde yaşay
Qırımtatar Milliy Meclisiniñ reisi ve o vaqıt halq deputatı olğan Refat Çubarov Qırım.Aqiqat Radiosında musafirlikte, 2017 senesi sentâbr ayı
Refat Çubarovnıñ 1944 senesi qırımtatar sürgünliginiñ qurbanlarını añma kününe bağışlanğan tedbirde, Kyiv, 2018 senesi mayısnıñ 18-i
Refat Çubarov Kyivde qırımtatar sürgünliginiñ 75-inci yılına bağışlanğan matem tedbirinde çıqışta bulundı, 2019 senesi mayısnıñ 18-i
Kyivde Qırımtatar bayraq künü, 2019 senesi iyünniñ 26-sı.
40 metrlik qırımtatar bayrağı 28 memleketni dolaşıp kelgen edi. Er birinde onı qırımtatar diasporalarınıñ vekilleri, siyasetçi ve faaller imzalağan edi.
Soñki eki yıl devamında koronavirus pandemiyası ve karantin sebebinden bu künnen bağlı büyük yürüşler ötkerilmedi.
Qırımtatar Milliy Meclisiniñ reisi Refat Çubarov, qırımtatar halqınıñ lideri Mustafa Cemilev ve Türkiye Tış işler naziri Mevlüt Çavuşoğlu (soldan sağğa) Kyivdeki «Qırım platformasınıñ» birinci sammitinde, 2021 senesi avgustnıñ 23-ü