Qırımtatar Milliy Meclisiniñ reisi Refat Çubarov Qırım sakinlerini mayısnıñ 26-ndan başlap Qırım yarımadasındaki Rusiye arbiy obyektleri yerlerinden "bir aftağa mümkün olğanı qadar uzaq qalmağa" çağıra.
Çubarov Rusiyeniñ Kyivge qarşı darbe qorquzuvlarından soñ raketa-dron darbeleri eki taraftan da olacaq, dep tahmin ete, Qırım Rusiye arbiy obyektleri çoq olğanı içün "ilk sırada" ola bile.
"Moskvanıñ soñki beyanatlarına köre, ve Lavrovnıñ Rubio ögündeki yayğarasına baqılsa, Kreml sakinleri delirdi. Netice olaraq – eki taraftan da raketa-dron darbeleri kerginleşecek… İşğal etilgen Qırım Rusiye arbiy obyektleri çoq olğan bir yer olğanı içün Ukrayina Silâlı quvetleri tarafından darbelerge oğraycaq ilk sıralarda buluna. Qırımdaki insanlarımızğa tevsiyemiz bar, ne yazıq ki, Rusiye barbarları arbiy bazalarını olarnıñ evlerine yaqın yerleştirdi: mayısnıñ 26-ndan başlap ve bir aftağa telükesizlik maqsadınen Rusiye işğalcileriniñ arbiy obyektlerinden mümkün olğanı qadar uzaq ketmek kerek", – dep yazdı Çubarov.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.
Azatlıq Radiosınıñ leyhası Qırım.Aqiqat jurnalistleri 2014 senesi Rusiye işğal etken Qırım yarımadasınıñ çalışqan, vaqtınca olğan ve qapatılğan Rusiye Federatsiyası arbiy obyektleriniñ interaktiv haritasını derc etken edi. Harita Qırım.Aqiqat jurnalistleri, Azatlıq Radiosınıñ "Shemı" leyhası, Qırımlı serbest hadimler, arbiy ekspertler ve RFE/RL Merkeziy haber hızmetiniñ hadimleri tarafından yapıldı. O, Azatlıq Radiosı ve Qırım.Aqiqat saytlarında ukrayin ve rus tillerinde derc etildi.