Qırımtatar Milliy Meclisiniñ reisi Refat Çubarov Qazahistan prezidenti Kasım-Jomart Tokayevniñ Rusiyeni Türk devletleri teşkilâtına davet etmek teklifini tenqit etti . O, teşebbüsni Kremlniñ Rusiye tesirini arttırmaq içün yapılğan areketiniñ bir qısmı olaraq adlandırdı.
Facebook saifesinde derc etilgen beyanatta Çubarov, Tokayevniñ teklifi Moskvada müsbet qıymetlendirildi, dep qayd etti. Onıñ fikrine köre, Qazahistan prezidenti ve Kremlniñ mevamları bir-birine oşağanı olarnıñ areketleriniñ uyğun olğanını köstere bile.
"Eminim ki, Tokayev Moskvanıñ istegenini seslendirdi", — dedi Çubarov.
Meclis reisiniñ fikrine köre, Merkeziy Asiya memleketleri TDT çerçivesinde işbirlikni, şu cümleden Rusiyeden bağlılıqnı eksiltmek içün de inkişaf ettire. Onıñ fikirince, Moskvanıñ teşkilâtta iştirak etmesi regiondaki devletlerge tesirini quvetleştire bile.
Çubarov, Tokayevniñ teşebbüsi Türkiyeni qıyın vaziyetke tüşüre, dep bildirdi. Onıñ aytqanına köre, Ankara birleşüv maqsadlarına zıt kelgen teklifke qol tutmaq ya da Moskva ile munasebetlerniñ fenalaşması telükesi arasında saylamağa mecbur olacaq.
Meclis reisi TDT memleketlerini Qazahistan prezidentiniñ teklifine qol tutmamağa çağırdı. O, Ukrayinağa qarşı Rusiyeniñ devam etken cenki ve Qırımtatarlarnıñ vatanı olğan Qırımnıñ işğali vaziyetinde teşebbüsni tenqit etti.