12 yıl apis cezasına mahküm etilgen Aqmescitniñ ekinci "Hizb ut-Tahrir" davasınıñ mabüsi İzet Abdullayevni ceza izolâtorına yolladılar ve Salavatnıñ 2-nci cezahanesiniñ kamera tipli odağa yerleştirüvnen tehdit eteler. Bu aqta "Qırım birdemligi" qırımtatarnıñ qadını Alime Abdullayevağa esaslanıp bildire.
Qırımtatarnıñ apayınıñ aytqanına köre, cazahanede bu qararnıñ sebepleri añlatılmağan.
"Arman ayınıñ 13-nde mektüp keldi. O, aynıñ birinde ŞIZO-dan çıqarılğanı ve aynıñ 6-sında kene anda yerleştirilgeni aqqında yazdı. İç bir izaat bermeyden, kene anda qapatqanlar. Şimdi onı kamera tipli odanen qorqutakar. Cezahanege daa endi kelgeninde aynı böyle qorquzuvlar olğan edi. Ve şimdi kene de öyle. Kamera tipli oda eñ sert cezadır. Onıñ sağlıq vaziyetinen böyle bir şeyge yol bermemek kerek", — dedi Abdullayeva.
Faallerniñ qayd etkenine köre, cezahanede bulunğan beş yıl içinde o, ceza izolâtorında 1021 kün keçirgen.
Abdullayevge "Zonatelekom" telefon bağı vastasınen de telefon etmekni yasaq eteler. Qorantasınen tek mektüp vastasınen bağlana bile.
Rostov-na-Donu Cenübiy okrugınıñ arbiy mahkemesi 2022 senesi quralaynıñ 12-nde ekinci Aqmescit "Hizb ut-Tahrir davası"nıñ mabüsleri Tofik Abdülgaziyev, Vladlena Abdülkadırov, İzzet Abdullayev, Mecit Abdurahmanov ve Bilâl Adilovğa qarşı qabaatlav qararını çıqardı. İzzet Abdullayev 12 yıl sert rejimli koloniyada qalmasına üküm etildi, ilk 5 yıl apishanede ve azatlıqtan çıqqan soñ 1 yıl azatlıqtan marum etilmesine üküm etildi.