Qırımtatar resurs merkeziniñ (QRM) idarecisi Zarema Bariyeva "Ukrayinskaya pravda" neşriyatınıñ "UP 100: Qadınlarnıñ küçü" mukâfatınıñ "Cemiyet" kategoriyasında ğalebe qazandı. O, mukâfatnı Rusiye ilhaqı şaraitinde tilini, medeniyetini ve kimligini saqlağan Qırımnıñ bütün qadınlarına, em de siyasiy sebeplerden apiske alınğan 52 Qırımtatar qadınına ve olarnıñ qorantalarına bağışladı, dep bildirdi saban ayınıñ 25-nde QRM.
"Men mukâfatımnı işğal altında qalıp, tilini, medeniyetini, kimligini, menligini ve dinini saqlağan bütün Qırım qadınlarınen, susmaq qolay olğanda susmağan Qırımnıñ 52 siyasiy mabüs qadınlarınen, işğalniñ 13 yılına ve vahşiy cenkke baqmadan er kün tuvğanları içün küreşken bütün qadınlarnen, qız qardaşlarnen, analarnen paylaşmaq isteyim", — dedi Bariyeva.
QRM-niñ idarecisi qayd etti ki, işğal etilgen Qırımda er ekinci qorantada siyasiy mabüs ya da siyasiy sebeplerden apiste yatqan yaqın insanı bar.
"Qırımtatar olaraq, men quvetli olmaq ne demek olğanını saylav esasında degil de, mecburiyet esasında añlayım. Men ailemizde, öz ecdatlarınıñ toprağında raat yaşap olamağan dörtünci qadın olam", — dedi o.
Bariyevadan ğayrı, çeşit kategoriyalarda namzetler arasında Qırımlı, rejissör, aktör ve Ukrayina Silâlı quvetleriniñ arbiyi Antonina Romanova, Qırımtatar ressamı, bestekâr Aziza Eskender ve Qırımtatar faali Gulnara Bekirova bar edi.