Qırımtatar asıllı ukrainalı rejissör Nariman Aliyev Avropa kinoakademiyasınıñ azası oldı. Bu aqta Ukraina Devlet kinosınıñ matbuat hızmeti haber ete. Aliyev özü de bunı Facebookta bildirgen edi.
Devlet kinosınıñ reisi Filipp İlyenko Nariman Aliyevniñ Avropa kinoakademiyasınıñ akademik statusını alğanınen tebrikledi.
«Narimannıñ icadında «Qırım ikâyeleri» qısqa film üzerindeki rejissör işi bar. «Evge» filmi ise Aliyevniñ uzun metraj filminde rejissör debüti oldı – bu sene Ukrainanı Cannes kinofestivaliniñ «Ayrı bir baqış» (Un Certain Regard) programmasında temsil etti», – dep aytıla Ukraina Devlet kinosınıñ haberinde.
Aliyev Avropa kinoakademiyasında qırqıncı ukrainalı kinematografist oldı.
Nariman Aliyev – qırımtatar rejissöri, «Qırım ikâyeleri» trilogiyasınıñ (qısqa film) müellifidir. Onıñ «Sensiz» filmi 66-ncı Berlin kinofestivaliniñ Generation 14+ çerçivesinde taqdim etilgen edi. Öz işlerinde Aliyev qırımtatarlarnıñ qoranta munasebetleri, ananeleri ve turmuşını aks ettire.