''QırımSOS" cemaat uquq qoruyıcı teşkilâtınıñ talilcisi Yevgen Yaroshenko, "Suspilne"ge Qırımdaki soñki Rusiye quvetçileri tarafından qırımlılarnıñ tutuluvını izaatladı.
Talilciniñ qayd etkenine köre, Qırımda yerli sakinlerniñ yaqalanuvı muntazam sürette yüz bere. Onıñ aytqanına köre, Rusiye quvetçileri er angi narazılıq numayışını bastırmaq içün çeşit uquqiy aletlerni qullana. Bunıñ içün em Rusiye Federatsiyasınıñ Memuriy uquq bozuvları kodeksiniñ normalarını, em de Rusiye Ceza kodeksiniñ maddelerini qullanalar.
''İşğalcilerniñ maqsadı ukrain simpatiyasınıñ eñ kiçik numayışını bastırmaqtır. Ve bunı yapmaq içün olar eki yıl evelsi peyda olğan Rusiye ordusını itibardan tüşürüv qanunını qullanalar, o em memuriy, em de cinaiy mesüliyetke çekilmeni közde tuta. Em de ekstremist teşkilâtnıñ timsallerini, natsist timsallerini ya da başqa yasaq etilgen teşkilâtlarnıñ timsallerini numayış etüv qaidesi", - dedi Yarosenko.
Talilci qayd etti ki, Ukrainada eki yıllıq cenk vaqtında böyle adiseler sıq-sıq qayd etile.
Bir kün evelsi Rusiye quvetçileri Herson vilâyetiniñ işğal etilgen Geniçesk şeerinde "Noman Çelebicihan" qırımtatar batalyonında iştirak etkeninden şübeli sayılğan yerli sakinni tuttılar.
Martnıñ 5-nde saba Qırımda qırımtatarlarnıñ evlerinde kütleviy tintüvler keçirildi. Bağçasarayda taqiqat tedbirleri "Qırım birdemliginiñ" faallerinde, Canköy rayonında ise diniy erbaplarda keçirildi. Umumen 10 qırımtatarınıñ evinde tintüvler keçirildi.
Mart ayınıñ başında ''QırımSOS'' teşkilâtı, Rusiyeniñ Ukrainağa büyük istilâsı başlağanından berli Qırımdaki Rusiye mahkemeleri RF ordusınıñ ''ayıplanuvında'' şübeli sayılğan 612 qarar çıqardı, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.