İşğal etilgen Qırımnıñ Canköy rayonında Rusiye quvetçileri tarafından Ernest ve Marlen Ahayevlerniñ yaqalanması zorlav ğayıp olma kibi sayıla bile. Bunı "QırımSOS" uquq qoruyıcı teşkilâtınıñ talilcisi Yevgen Yaroşenko bildirdi.
"İşğal etilgen Qırımnıñ Canköy rayonında qırımtatarlar Ernest ve Marlen Ahayevlerniñ yaqalanmasında zorlav ğayıp olmanıñ er üç elementi bar. Birincide, Ahayev qardaşları yaqalandı. Ekincide, olarnı polis hadimleri, işğalci devletniñ resmiy temsilcileri yaqaladı. Üçüncide, Rusiye quvetçileri Ahayev qardaşlarını belli olmağan tarafqa alıp kettiler: sabadan aqşamğace tuvğanları ve advokatlar olarnıñ bulunğan yerini bilmey ediler", - dedi Yaroşenko.
Dekabrniñ 19-nda işğal etilgen Qırımnıñ Canköy rayonındaki Avuz Qırq köyünde rusiye quvetçileri üç qırımtatarnıñ evinde tintüv keçirgen. Faallerniñ haber etkenine köre, tintüvnler ağa-qardaş Ernest, Marlen ve Amet Ahayevlerniñ evlerinde olıp keçken.
Rusiye quvetçileri bugün saba Qırımda yaqalanğan Ahayev qardaşlarınıñ bulunğan yerini bildirmey. İhtimal ki, olar iskencelerge oğratıla. Bunı Qırım.Aqiqatqa uquq qoruyıcı Lilâ Gemeci bildirdi.
Rusiye quvetçileri dekabrniñ 19-nda yaqalanğan Ernest ve Marlen Ahayevni azat etti.
Cumaaqşamı künü, dekabrniñ 15-nde, Canköy rayonınıñ Avuz Qırq (Medvedevka) köyünde qırımtatarı Mustafa Murahasnıñ evinde tintüv keçirildi – Rusiye uquq qoruyıcıları «yasaqlanğan şeylerni» qıdırdı. Berilgen malümatqa köre, Rusiye İç işler nazirliginiñ hadimleri Avuz Qırqnıñ sakinine silâ ve narkotik qıdırmağa kelgen eken. Rusiye uquq qoruyıcıları ev saibinen bağlı haber kelgen, evinde «yasaqlanğan şeyler» ola bile eken, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.