Aqmescitte martnıñ 15-nde Rusiyeniñ Qırım işğaliniñ beşinci yılına bağışlanğan resmiy tedbirler keçirile.
Tedbirde Qırım ükümetiniñ Rusiye yolbaşçısı Sergey Aksenov, Qırımnıñ Rusiye parlamentiniñ spikeri Vladimir Konstantinov, Rusiye Devlet dumasınıñ spikeri Vâçeslav Volodin, Rusiye Devlet dumasınıñ deputatları iştirak etti.
Aqmescit, 2019 senesi martnıñ 15-i
Tedbirler çerçivesinde bayram yürüşi ve miting keçirildi.
Martnıñ 15-nde Devlet dumasınıñ Şurası Qırımnıñ Rusiye parlamenti ve Aqyar ükümeti ile toplaşuv keçirdi. Devlet dumasınıñ spikeri Volodin Rusiye Ukrainadan 25 yıl devamında erkânında Qırım olğanı içün ivaz istemeli, dep bildirdi.
Aqmescit, 2019 senesi martnıñ 15-i
Qırımnıñ Rusiye ükümetiniñ yolbaşçısı Sergey Aksenov Rusiye ükümetine ve memleket prezidenti Vladimir Putinge 2014 senesi Rusiyege Qırımnı ilhaq etmege yardım etken areketleri içün Facebookta teşekkürler bildirdi. O, Qırımnıñ «samooborona» vekilleri ve Qırım ve Kuban qazaqlığına da teşekkürler bildirdi.
Aqmescit, 2019 senesi martnıñ 15-i
Aqmescitke alt palatanıñ reisi Vâçeslav Volodin yolbaşçılığında Rusiye Devlet dumasınıñ deputatlar gruppası keldi. Olar Rusiyeniñ Qırım işğaliniñ beşinci yılına bağışlanğan tedbirlerde iştirak etmege niyetleneler.
Aqmescit, 2019 senesi martnıñ 15-i
Martnıñ 15-nde Aqmescitte Qırım ilhaqınıñ beşinci yılına bağışlanğan avtoyürüşni Rusiye bayraqlarınen keçirmege planlaştırıla.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.