Melas qasabasında (büyük Yalta) tünevin bir aqay qızınen beraber qayağa köterildi, amma andan özleri tüşip olamadı, dep bildire Rusiye FVN-niñ Qırım idaresi.
"Qıdıruv yerine kelgen soñ, turistlerni kördik. Adamlarnı alpinist aletleri yardımınen qayadan tahliye ettik. Aqay ve onıñ qızınıñ - Moskova sakinleri - tibbiy yardımğa muhtacı yoq edi. Olar ile dağlarda telükesizlik qaideleri aqqında subet keçirildi", - denile beyanatta.
FVN, dağ-ormanlıqqa ketecek turistlerge telükesizlik qaidelerini hatırlata: birinciden, urba ve ayaqqap qolay olmalı, havfsız marşrutlarnı saylamalı, tuman ve qaranlıq vaqtında kezinmemeli, cap ve ayrı turğan taşlardan yürmemeli.