Qırım, logistika yollarına büyük bağlılığı sebebinden, Rusiyeniñ işğal etken diger Ukrayina topraqları ile qıyaslanğanda pek zayıf alda buluna, dep bildirdi FREEDOM telekanalınıñ efirinde Ukrayina Arbiy-deñiz quvetleriniñ spikeri Dmıtro Pletençuk.
"Qırım, şübesiz ki, Rusiye işğalci ile sıñırdaş olğan diger regionlarğa baqqanda, işğal etilgen territoriya olaraq daa hassas ola. Bu, belli bir derecede, onıñ al etici faktorı ola", — dep qayd etti o.
Spikerniñ aytqanına köre, Rusiye ordusınıñ Qırımğa ketken logistika yolları bozulsa, bu region bütünley izolâtsiyağa oğray bile.
Ve, elbette, olar öz informatsion alanında "eyi niyet işareti" olaraq adlandırılğan stsenariyni tekrarlay bileler. Elbette, bunıñ aqqında aytmaq pek erte. Amma er alda olar ada olmaq istemeyler", — dep qayd etti Pletçençuk.
İyülniñ 23-nde Ukrayina Silâlı quvetleriniñ Baş ştabı Rusiyeniñ Krasnodar ülkesindeki "Kavkaz" limanında "Slavânin" Rusiye demiryol paromınıñ bozulğanını tasdıqladı.
"Kavkaz" limanı işğal etilgen Keriçten çıqqan paromnıñ soñ noqtasıdır. Keriç köprü qurulmazdan evel paromlar Rusiye Federatsiyası tarafından yarımadağa yük ketirilmesinde müim edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.