Qırımnıñ Rusiye akimiyeti Yandex. Terciman" qullanımına Qırımtatar tiliniñ qoşulması aqqında "Yandex" ile añlaşma imzalamaqnı planlaştıra. Bu aqta TASS Qırımnıñ milletlerara munasebetler Rusiye devlet komitetiniñ reisi Ruslan Yakubovnıñ sözlerine atuf etip bildire.
"Mayıs ayında "Yandex", MİFA (Milletler işleri Federal agentligi) ve Devlet milliy komiteti temsilcileri arasında üç taraflı añlaşma imzalanması planlaştırıla. Şimdi birinci, azırlıq basamağı keçe, anda Qırım devlet müendislik-pedagogika universitetiniñ alimleri iştirak ete. Bu pek ağır iş olacaq, çünki suniy aqıl ögrenecek. Kelecek 2027 senesine qadar bu işlerni yekünlemege ümüt etemiz", — dedi o.
Qayd etilgenine köre, leyha Rusiye Federatsiyasınıñ lideri Vladimir Putin tarafından ilân etilgen "Rusiye halqlarınıñ birligi yılı" çerçivesinde amelge keçirile.
Qırımdaki Rusiye akimiyeti yarımadada üç devlet tili bar olğanını resmiy şekilde beyan ete — Rus, Ukrayin ve Qırımtatar. Em de bütün bu tillerde tasil esnası temin etile. Qırımda Ukrayin ya da Qırımtatar tilleriniñ qullanuvı yasaq etilmey. Amma milliy azlıqlarnıñ ekseriyeti ana tilinde tasil alma imkânları yoq.