QIRIM — Rusiye tarafından işğal etilgen Qırımnıñ Qarasuvbazar rayonında Qarasuvbazar ve Taygan suv anbarlarınıñ toluvı ile bağlı vaziyet kerginleşmege devam ete. Birinciniñ cenübiy qısmı aman-aman qurudı. Bu aqta Qırım.Aqiqatqa adını aytmamaq şartınen yerli bir ülkeşınas bildirdi .
Onıñ malümatına köre, böyle vaziyet bu sene Qarasuvbazar ve Taygan suv anbarlarında faydalı suvnıñ vaqtından evel ğayıp olmasına ketire bile.
Qarasuvbazar suv anbarı
"Suv az olğan yıllarda bile akimiyet Qırımnıñ er vaqıt sıcaq ve aman-aman er vaqıt qurğaq olğan yazları ögünde Qarasuvbazar suv anbarında suv yedeklerini tutmağa tırışa edi, suv resursı olması içün, onı Qırımnıñ cenübiy-şarqında suv qıtlığı kerginleşken vaqıtta qullanmaq mümkün edi. Bu sene mantıqsız bir şey olıp keçe — suv endi sarf etile. Yazda ne yapacaqlar, Qırımnıñ suv telükesizligi içün strategik emiyetke saip olğan Qarasuvbazar suv anbarı daa yazğa qadar suvnıñ faydalı miqdarını coyacaq?" — Qırım.Aqiqatqa yerli mütehassıs vaziyetni izaatladı.
Ülkeşınas, Çeçekte sıq yağanaqlarğa baqmadan, Qarasuvbazar suv anbarını toldurğan Buyuk-Qarasuv özeniniñ yuqarı aqımı suvsuz qala, dep qayd etti.
Büyük Qarasuv özeni
Bilgenimiz kibi, Büyük Qarasuv özeniniñ başı Qırımnıñ eñ quvetli qaynağından başlay, amma anda, qaynağında, beñli balıq istisalı boyunca müessise keñişletile, onıñ içün suvnıñ büyük qısmı bu hocalıqnıñ ihtiyaclarına kete. Bu sebepten Aqyar suv anbarına daa az suv kele. Ve o, eskisi kibi temiz degil. 2014 senesinden soñ Qırımda biznes menfaatları adiy insanlarnıñ ve ekologiyanıñ menfaatlarından üstün oldı, dep qayd etti ülkeşınas.
İşğal etilgen Qırımnıñ Rusiye akimiyetiniñ suv teminlevi ile bağlı vaziyetniñ eyileşüvi aqqında aytqanlarına baqmadan, kerçek vaziyet, Qarasuvbazar ve Taygan suv anbarları misalinde, bu suniy suv anbarlarında suv yedekleriniñ eksilüvini köstere.