Rusiye tarafından işğal etilgen Qırımda Qırım yarımadasınıñ eñ büyük özenlerinden biri olğan Büyük Qarasuv özeniniñ suvu aman-aman qurudı, çünki Qarasuvbazar suv anbarından onıñ özenine suv berilmey qaldı. Bu aqta Qırım.Aqiqatqa adını aytmamaq şartınen yerli ülkeşınaslardan biri bildirdi .
Onıñ aytqanına köre, Qarasuvbazar suv anbarından suvnıñ berilmesi toqtatılmasınıñ sebebi, Qırım içün strategik olaraq müim olğan bu suniy suv anbarında suv seviyesiniñ keskin eksilmesidir.
"Çeçek ayında Qarasuvbazar suv anbarında suv seviyesi keskin şekilde tüşmege başladı ve aynıñ üçünci dekadasında bu suv anbarınıñ cenübiy qısmı bayağı azlaştı. Qırımnıñ cenübiy-şarqında Qarasuvbazar suv anbarından kelgen suvğa ihtiyac olsa da, akimiyet suv taşuvını toqtatmağa mecbur oldı, akis alda suv anbarı bütün faydalı suv miqdarını coyacaq edi. Özen qurumasın dep Taygan suv anbarından Biük-Qarasuv özenine suv azca tüşürilmekte", - dep haber etti ülkeşınas.
Taygan suv anbarı
Ülkeşınasnıñ malümatına köre, şimdiki vaqıtta Büyük Qarasuv özeni özen degil de, çoqraq kibi körüne.
"Buyuk Qarasuv şimdiki vaqıtta çoqraqqa beñzey, Qarasuvbazarda suv, buyuk Qarasuvbazarğa Tanasu özeninden aqqan suvlar sayesinde qoşula. Umumen şimdi yalıñız Salğır ve cenübiy-şarqiy Qırımnı suvarğan Şimaliy-Qırım beketini toldurmaq içün quyulardan suv qalmaqta", — dep qayd etti o.
Taygan suv anbarı
Qırım yarımadasınıñ suv teminlevi ile vaziyet Şimaliy-Qırım beketinden Dnipro suvunıñ berilmesi toqtatılğan soñ fenalaştı.