Qırımnıñ cenübiy yalısınıñ sakinleri hafif yerastı sarsıntısını is ettiler. Bunı yerli telegram kanalları ve Qırımnıñ işğal yolbaşçısınıñ mesleatçısı Oleg Krüçkov Aluşta zelzeleşınaslıq stantsiyasınıñ malümatına atfı etip bildire.
"Qara deñizdeki zelzele aqqında malümat. Aluşta zelzeleşınaslıq stantsiyasınıñ nevbetçisinden saat 16:25 Qara deñiz akvatoriyasında Aluştadan 15 km uzaqlıqta ve 15 km terenliginde 3 büyükliginde zelzele qayd etilgeni aqqında malümat keldi. Qırım Cumhuriyeti territoriyasında az duyuldı. Aqibetler ve dağıluvlar yoq", - dep yazdı Krüçkov.
Yerastı sartıntılar aqqında Yalta, Gurzuf ve Massandra sakinleri haber etti.
Evel fevralniñ 27-nde 5,6 büyükliginde Türkiyeniñ Malatya şeerinde zelzele yüz berdi. Berilgen malümatqa köre, eñ az 22 bina yıqılğan, 20 adam hastahanege yatqızılğan, 1 adam ölgen.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.