Armannıñ 18-nde gece Ukrayin pilotsız uçaqları Qırımnıñ Cenübiy energetik rayonınıñ elektrik teminlev obyektlerine ücüm etti. Neticede meskün yerlerniñ bir qısmı yarıqsız qaldı. Bu aqta "Krımenergo" haber etti.
"Bu gece yarımadanıñ Cenübiy energetik bölügine Ukrayina silâlı quvetlerniñ uçaqsız ücümi yapıldı. Ealiniñ bir qısmı yarıqsız qaldı. Energetikler fevqulâde vaziyetni ğayrıdan tiklemege başlaylar. Qırımnıñ şimal-ğarbiy, şarqiy ve cenübinde elektrik energiyasınen bağlı vaziyet alâ daa qıyın. Qırım Cumhuriyetiniñ bütün territoriyasında elektrik teminlevi sıñırlana. Elektrik rayonlarda vaziyetke köre kesile", — dep aytıla haberde.
Bundan ğayrı, gece daa Balıqlava yaqarlıq stansiyasından küçüni dağıtqan "Sevastopol" 330/220/110/35 kV PS elektrik stansiyasına da ücüm etilgen.
Ukrayin arbiyleri vaziyetni şimdilik izaatlamadı. Qırım.Aqiqat ise cenk şaraitinde bu malümatnı mustaqil olaraq teşkip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.