"Sarı şerit" areketiniñ faalleri Qırım şeerlerinde yerleştirilgen Ukrayina destegine plakatlarnıñ, levhalarnıñ ve diger ukrayin tirenüv timsalleriniñ yañı fotoresimlerini derc etti.
Aqmescit, Aqyar, Yalta ve Bağçasaraydan alınğan fotoresimler "Sarı şerit" areketiniñ telegram kanalında derc etildi.
"Sarı şerit" areketiniñ faalleri sayesinde vaqtınca işğal etilgen Aqmescit, Aqyar, Yalta ve Bağçasaray soqaqlarında Ukrayina destegine plakatlar, şeritler ve vatanperver risaleler peyda ola. Tirenüv timsalleri, hususan, "Simferopol" musafirhanesi yanında, duraqlar yanında, ilân levhalarında ve bir çoq başqa yerlerde peyda oldı", — dep aytıla haberde.
"Sarı şerit" teşkilâtı Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketi. Areket teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyet eñ faal, hususan Aqmescit, Yalta, Kezlev ve Kefede, soñki vaqıtları ise olarğa kiçik şeerlerniñ de sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.