SUDAQ — Rusiye tarafından ilhaq etilgen Qırımda büyük yol qurucılığı başlandı — Tavrida trassasından Sudaqqa qadar yañı yol qurmağa planlaştıralar. Bu vaziyet ne içün cemaatçılıqnıñ qasevetini doğurğanını Qırım.Aqiqatnıñ materialında oquñız.
Qırımnıñ Rusiye Avtomobil yolları hızmetiniñ yolbaşçısı Maksim Tarasovnıñ aytqanına köre, yañı yol "Tavrida" trassasınıñ yolunı qısqartacaq.
"Bu yol "Tavrida"dan yalığa üç çıqıştan biridir. Sudaq ve "Tavrida" Art-klasteri inkişaf etkenini köz ögüne alsaq, bu "Tavrida"dan Sudaqqa qadar yolnı 30-40 daqqa qısqartacaq, em de Gruşevka, Perevalovka ve Daçnoye üzerinden keçken trafikni yoq etmege imkân berecek", — dep bildirid Tarasov.
Kefe trassası yanında yañı yol qurucılığı, soñra yol Qırım ormanından Sudaqqa ketecek
Leyhanıñ fiyatı aman-aman 24 milliard ruble. Gruşevka yanından Sudaqqa qadar yolnıñ dört yolaqlı qısmı planlaştırıla. İşlerni 2027 senesine qadar bitirmekni planlaştıralar.
Qırımnıñ işğalden azat etilmesi içün #LiberateCrimea halqara areketiniñ Qırım bölüginde Qırım.Aqiqatqa, yañı yolnıñ qurucılığınıñ esas lobbisti "Tavrida" Art-klasteri oldı, dep bildirdiler.
Qırımdaki ekotsid qorqunçlı tezlikte inkişaf ete
"Tavrida-ART" yaratıcıları başta Kapsel körfeziniñ tabiatını yoq ettiler, amma bu olarğa yeterli olmadı, şimdi olarnıñ qolaylığı içün yüz biñlernen terek yoq etilecek, Qırım ormanı ise trassanı dört yolaqqa bölecek. Qırımdaki ekotsid qorqunçlı tezlikte inkişaf ete. Bunı ne toqtata bile? Yerli ekologik teşkilâtlar çoqtan berli akimiyetniñ isteklerine qol tutıp, büdjet grantlarından para masraf eteler. Cemaatçılıqnıñ küçü yoq, ekologiya faalleri ekstremistlerge çevirilgenini Kapsel qurucılığından bilemiz. Şunıñ içün tek Qırımnıñ işğalden azat etilmesi Qırım tabiatına nisbeten bu qarışıqlıqnı toqtatmağa imkân berecek", — dep qayd ettiler #LiberateCrimea Qırım bölüginde.
Büyük topraq qatlamları yañı yol qurulğanda çıqarıla, bu tek topraq örtüsine degil de, şarqiy Qırımda zaten az olğan yerastı suvlarınıñ dağılmasına da menfiy tesir ete
Qırımnıñ Rusiye tarafdarı cemaatçısı Boris Yaremkonıñ fikrince, orman içinden Gruşevkadan Sudaqqa qadar yolnıñ qurulması bütün regionnıñ ekologiyası içün büyük zarar ketirecek.
Orman — bizim servetimizdir, ve onı böyle vahşiyce yoq eteler
"Lgovskoye-Gruşevka-Sudaq yolunıñ qurulışında yüz biñlernen terek ve çalı keri qaytarılmaycaq şekilde yoq etilecek. Güzel ormanlar yıqtırılacaq... Kapselde "Tavrida" festival territoriyası yalıñız yaz mevsiminde çalışa. Ne içün o yerge dört yolaqlı yolnı ketirmek kerek? Şeer, köy ve qasabalarda yollarnıñ episi yahşı ve asfaltlanğanmı? Orman — bizim servetimizdir, ve onı böyle vahşiyce yoq eteler. Amma ormandan ğayrı, quşlar ve kiçik ayvanlar ile bir ekosistema bar! Bu, Qırım ekologiyası içün büyük ve qaytarılmaz bir ğayıp", — dep paylaştı öz fikirlerinen abunecilerinen cemaatçı.
Qırım sakinleri telâşlana — Qırım ormanı yoq etile.
Qırımda olğan şeyler keder degil de, qorqu doğura
"Qırımda ekologik cenk ilân etilgen kibi duyula. Qırımda olğan şeyler keder degil de, qorqu doğura. Hususan, Yalta yolunen ketkende ve kesilgen tereklerni körgende, ve yerli akimiyetniñ (ve tek o degil) medeniy-tarihiy ve tabiat müitiniñ saqlanuv meselelerine "ilmiy" yanaşuvını bilgende (ilmiy iş ise "ekonomik" sınıfından maliye etile). Bu paralar balalarımızğa ne qadar zarar ketirecek... Men, tuvğan Aqmescitim kibi naqliyatnen tolu şeerde, park zonalarında çoq qatlı binalar ve kütleviy yeşilliklerniñ kesilüvi aqqında aytmayım": — dep qayd etti yazısına izaat bergen İrina Filippova.
Qırımlılar, açuvlanğanlarına baqmadan, "Rusiye kerçeklerinde" vaziyetke tesir etmege küçleri yetmegenini aytalar.
Paral qırsızlamaq içün, ekologiya aqqında kimse tüşünmey. Qırımnı sahrağa çevirmege tırışalar. Qorqudan qıçırmaq isteyim, amma buña tesir etip olamağanım içün susıp ağlayım", — dep yazdı Yaremkonıñ yazısına Alupka sakini İrina Mahınko.
"Tavrida" trassasınıñ qurucılığı vaqtında yanındaki ağaçlar, şu cümleden orman sızıqları bütünley yoq etildi, olar öyle de tiklenmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.