Bir taraftan baqsañ, blogerniñ maqalesi büyük siyasetke nasıl tesir ete bile? Amma tesir ete eken. Albert Kangiyevniñ Qırımdaki Rusiye ükümetiniñ reisi vazifesine tayinlenüv ihtimaline dair maqalemniñ böyle aqibetleri olacağını iç tüşünmez edim…
Blog çıqqanınen qırımtatar tanışlarımdan, em de çeşit içtimaiy qatlamlardan, Kangiyev tayinlenmesinden ne beklegenlerini eşitip başladım. Birisi bunı takbih ete, digeri, aksine, quvana, çünki bir qırımtatarı bu yüksek vazifede olsa, halqına yardım etip olur, dep tüşüne. Yani er şey bar edi, amma bu mevzuğa lâqayt degiller. Ne deyim, amma bir çoq qırımtatarı içün Qırımda bu yüksek vazifede qırımtatarını körmek (birileri quvanır, ekseriyeti ise kederlenir) eyecanlı olur edi.
Qırımnıñ Rusiye baş naziri vazifesine Yuriy Gotsanük tayinlengen soñ kene de akimiyette malümat menbaları olğan tanışlarımdan Sergey Aksenov Kangiyevniñ tayinlenmesine dair öşeklerniñ Qırımda tarqalğanını begenmegenini eşittim. Maña aytılğanı kibi, Aksenov Kangiyevni Ruslan Balbek oña aytmayıp ögge alğanını begenmedi. Balbekni öz adamı olaraq sayğan Qırımnıñ Rusiye yolbaşçısı içün böyle bir şey bilmek hoş olmaz edi. Aralarında sert bir subet olğan soñ Balbek keri adım atqandır.
Sır degil ki, Ruslan Balbek Rusiye Devlet dumasında yüksek vazifege tayin etilgen soñ Moskvadaki bağları çoq oldı. İstegi olsa edi, qarşı çıqmağan ve idare etilgen Kangiyevni Qırım baş naziri yapar edi. Faqat tarqalğan öşekler işini yaptı. Aksenov tedbir aldı – er vaqıt kibi, doğrudan-doğru ve uzlaşuvsız.
Em Rusiye akimiyeti, em qırımtatar halqı Qırımdaki akimiyette qırımtatarlarnı körmege istemey
Tarqalğan öşekler Kangiyevniñ planlarına kerçekten keder etken olsa, o (büyük siyasetni çette qaldırsaq) yahşı idareci ve namuslı bir adam, onı acımaq mümkün, amma ekseriyeti Ukraina tarafdarı olğan qırımtatar halqı içün Kremlniñ böyle geopolitik adımı zararlı olur edi. Neticede añlaşıla ki, em Rusiye akimiyeti, em qırımtatar halqı Qırımdaki akimiyette qırımtatarlarnı körmege istemey. Söz sırası, bunı tek Kangiyevniñ vaziyeti isbatlamay, o, bütün ğayretlerine baqmadan, sentâbr ayında olğan Rusiye yerli şura saylavlarında şimdilik vazifesiz qaldı. Bu saylavlar vaqtında da belli oldı. Qırımtatar namzetlerini köstergen Kangiyevniñ adamları aytqanına köre, akimiyet az qırımtatarı deputat olsun dep, elinden kelgenini yaptı. Qırımtatarlarnı kirsetmemek içün kütleviy bozuvlar oldı.
Şunıñ içün qırımtatarlarnı Rusiye akimiyet organlarına celp etüv lafları – tek laf olıp qala. Amelde ne Aksenov-Konstantinov, ne de şeer ve rayon seviyesinde qırımtatarlarğa ilerilemege bermeyler. Aslında, qırımtatar halqı daa çoq fayda köre – işbirlikçiler ne qadar az olsa, o qadar yahşı. Öz printsiplerine sadıq qalıp dayanmaq kerek. Qırımnıñ uquqiy akimiyeti Qırımda kerçek akimiyet olacaq vaqıtlar yaqınlaşa. Dünya siyasetindeki tendentsiyalarğa baqılsa – er şey bunı köstere…
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün