Ekinci Aqmescit "Qırım musulmanları davası"nıñ mabüsi Tofik Abdülgaziyev apishaneniñ hastahanesinde tedaviylenmekten vazgeçip, apayını körmek istedi.
Bu aqta onıñ qadını Aliye Kürtametova Facebookta yazdı.
Onıñ aytqanına köre, soñki mahkeme oturışuvı vaqtında Abdulgaziyevge qarşı "mahkemege sayğısızlıq" maddesine istinaden yañı cinaiy dava açılğan. O, mahkeme ve apishaneniñ ekimleriniñ areketlerine duyğulı şekilde cevap bergen soñ oldı.
Kurtametovanıñ aytqanına köre, mahkeme arfesinde aqayını ekimler konsiliumına alıp ketkenler, anda teşkerüv yerine vesiqalarnı imzalamağa zorlağanlar, amma içindekilernen tanışma imkân bermegenler. Hususan, körüvi zayıflaşqanı içün o, bütün metinni özü oqup olamağan, ekimler ise metinni sesli oqumağa razı olmağanlar.
Daa soñra mahkemede bu vesiqalar Abdulgaziyevniñ tedaviylev talabı yoq ve ağır hastalıqlarğa baqmadan apiste bulunmağa devam ete bile, dep iddia etmek içün sebep olaraq qullanıldı.
Apayınıñ aytqanına köre, Tofik Abdulgaziyevniñ bir sıra ağır hastalığı bar, şu cümleden, yaman tabiatlı miy şişigi, verem, pnevmoniya, yürek yetersizligi ve diger ağırlaşmalar.
Mahkemeden soñ Abdulgaziyev apishanege qaytmaq içün ariza berdi ve tedaviylenüvden vazgeçti. O, öz qararını, hastahanede körüşüvler olmağanı içün, apayını körmek istegeninen añlattı.
"Hastahanede körüşüvlerni yasaq eteler. Apishanede körüşe bilecekmiz. Bir şeyler deñişir dep ümüt etip, daa çoq vaqıtnı ğayıp etmek istemeyim... Bu ömürde bir daa körüşip olamağanımız mümkün, şu sebepten, ayaqta olğanım vaqıtta, apishanege keterim, sen de yanıma kel", — dep bildire onıñ sözlerini Kurtametova.
Kurtametova, aqayınıñ sağlıq vaziyeti ve aqlarını körmemezlikke urğan Rusiye "adaletiniñ" saylavcılığını da qayd ete.
2022 senesi quralayda Rostov-na-Donu Cenübiy okrugınıñ arbiy mahkemesi Abdulgaziyevni 12 yıl sert rejimli koloniyada qalmasına üküm etti. İlk beş yılını o, apishanede keçirmek kerek. Bir yıl soñra, 2023 senesi quralayda, Vlasiha şeerindeki İstinaf arbiy mahkemesi birinci instantsiya mahkemesiniñ qararını deñiştirmedi.