"Qırım musulmanları davası" boyunca mahküm etilgen Eskender Abdulganiyevni beş ay devamında Rusiye Federatsiyasınıñ Kemerovo vilâyetindeki 41-nci ceza izolâtorında tutalar ve apis müddetini devamlı uzatıp turalar. Bu aqta "Qırım birdemligi" haber ete.
Qayd etilgenine köre, mayısnıñ 16-nda apis komissiyası qırımlını "daimiy bozuvlarğa meyilli" dep adlandırdı. Onı alğanları ve sert tutuv şaraitlerine avuştırğanları aqqında ilân ettiler.
Abdulganiyev, tutuluv şaraitleri qanaatlendiricisiz olğanı aqqında tarif etti: "Kamerada avalandıruv yoq, açıq pencere vaziyetni qurtarmay. Sıcaq ava vaqtında kamerada pek sıcaq ve tınçıq. Men ekinci qatta bulunam, amma birinci qat dımlılıq. Gece pencerelerni açsañız, sıçanlar kele. Men bellesem, ŞİZO ve SİZO binası yaşamaq içün degil".
Suvnıñ keyfiyetinden de şikâyet etti — onı tek musluqtan almaq mümkün, amma suv totlu, tübünde ise qum qala.
"Suvnıñ böyle olması aqqında prokurorğa bildirdim, o ise vekâletli adamımnıñ şikâyeti ile keldi. O, daa evel bu suv teşkerüvge yollanılğanını ve o, sanitar normalarğa uyğanını añlattı", — dep tarif etti Abdulganiyev.
Eskender Abdulganiyev, Arsen Abhairov ve Rustem Emiruseinov 2019 senesi fevral ayında Qırımnıñ Qurman rayonınıñ Büyük Onlar qasabasında tutuldı. Rusiye FSB-si qırımlılar Rusiyede ve ilhaq etilgen Qırımda yasaq etilgen "Hizb ut-Tahrir" teşkilâtınıñ faaliyetine alâqası bar, dep iddia ete edi.
Noyabrniñ 3-nde Rusiyeniñ Rostov-na-Donu şeerindeki Cenübiy okrugınıñ arbiy mahkemesi Qurman "Hizb ut-Tahrir" davasınıñ üç mabüsini 42 yılğa apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.