Noman Çelebicihan batalyonınıñ davası boyunca Rusiye apishanesinde tutulğan Qırımlı Ruslan Abdurahmanov rejimniñ sertleşmesi sebebinden bir kişilik kamerağa avuştırıldı. O, 2027 senesi Çeçekniñ 20-ne, apis müddeti bitkenine qadar sert izolâtorda qalacaq. Bu aqta Facebook saifesinde Qırımtatar Resurs Merkeziniñ idarecisi Zarema Bariyeva bildirdi.
Aq qorçalayıcılarnıñ malümatına köre, dört buçuq yıldan ziyade apiste yatqan 35 yaşındaki Qırımlınıñ sağlığı fenalaştı.
"Apiske alınğan vaqıt devamında Ruslannı bir qaç kere ve uzun müddetke kartser ve BUR (qattı rejimli barak) apishanelerine yerleştirgen ediler. İşğalciler bunı bilerek yapalar, hastalıqlarını daa da beter etmek içün. Hususan, erkekniñ psoriaz hastalığı bar, onıñnen beraber şiddetli qaşınuv, em de ağır nevrologik patologiya ⁇ qan damarlarınıñ sıqılaşması ve baş miyine az miqdarda avanıñ berilmesi sebebinden bedeniniñ sol qısmınıñ daimiy olaraq yaramaylaşması", — dep qayd etti Bariyeva.
Aq qoruyıcılar qayd eteler ki, Ruslan Abdurahmanov apiske alınmazdan evel omurgasınıñ boyun bölüginden üç quyuldıqnıñ alınması içün acele ameliyatqa muhtac edi ve qan damarları ile problemlerge sebep olğan nevralgiyadan azap çeke edi, amma koloniyada oña ameliyat yapmağa izin bermediler. Aynı zamanda koloniyanıñ tibbiy bölüginde Qırımlığa bir sıra ilâc yazılğan edi, amma olarnıñ adları ve qullanuv usulları gizlenilmekte, onıñ içün o, belli olmağan ilâclarnı qullanmaqtan qorqa.
QRM haber etkenine köre, Abdurahmanovnıñ qorantası tutuluv müddeti devamında onıñnen bir kere bile körüşip olamadı, eki kiçik qızı ise babasını tek fotoresim ve anasınıñ ikâyelerinden hatırlay.
Abdurahmanovnı Rusiye quvetçileri 2022 senesi baarde Herson vilâyetiniñ Azovskoye qasabasında yaqaladı. Noman Çelebicihan batalyonında iştirak etkeni içün Rusiye makemesi tarafından beş yıl sert rejimli koloniyada qalmasına maküm etilgen Abdurahmanov da Rusiye quvetçileri tarafından işkencege oğratılğanı aqqında tarif etti. Aq qorçalayıcılar Abdurahmanovnı siyasiy mabüs olaraq tanıdı.
2023 senesi Boşta Abdurahmanovnı Rusiye Federatsiyasınıñ Tambov vilâyetindeki Miçurinsk şeerindeki 5-nci tüzetüv koloniyasına etap etkenleri aqqında haber etilgen edi.