Qırımnıñ Curçı rayonında Rusiye ordusında askerlik yapmağa istemegen er adam mahküm etilecek. Bu aqta Qırımnıñ Rusiye prokuraturasınıñ matbuat hızmeti bildire.
Müessiseniñ malümatına köre, adı aydınlatılmağan erkek «kelgen celpnamelerge baqmadan, arbiy komissarlıqqa dört kere sebepsiz kelmedi, böylece askerlik yapmamaq içün sebebi olmasa da, arbiy hızmetten vazgeçti».
Rusiye prokuraturasınıñ bildirgenine köre, dava Rusiye kontrolindeki mahkemege temelden baqıluvına yollanıldı. Qabaatlanğan kişi 2 yılğa qadar apiske alına bile.
Yarımadada Rusiye ordusına aluv kampaniyası oktâbrniñ 1-nde başladı, 2019 senesi dekabrniñ 31-ne qadar devam etecek. Aq qorçalayıcılar qırımlılarnıñ Rusiye ordusına celp etilmesini takbih etti.
Bundan evel 2019 senesi baarde askerlikke çağırılğan qırımlılarnıñ 85%-ı qomşu Rusiyeniñ bazalarına yollanıldı, dep haber etilgen edi.
Kyiv, Rusiyeden işğal etilgen Qırım sakinleriniñ silâlı quvetlerine celp etilüvini toqtatmasını talap ete.
Qırım Muhtar Cumhuriyetiniñ prokuraturası, Rusiye ordusında askerlik yapmaq içün celpname alğan qırımlılardan telefon ya da elektron poçta vastasınen muracaat etmelerini rica ete.
Ukrainadaki BM insan aqları monitoring missiyası bildirgenine köre, 2017 senesi eñ az 4800 Qırım sakini Rusiye silâlı quvetlerine çağırıldı. OSCE ABD işleri vaqtınca vekâletlisi Garri Kamiannıñ malümatına köre, 2018 senesi 5600 qırımlı Rusiye ordusına çağırıldı.