Kezlevde cenkke qarşı narazılıq aksiyasını keçirgen soñ, Rusiye mahkemesi tarafından 15 yıl apis cezasına mahküm etilgen Qırımlı ressam Bogdan Zizanıñ apiske aluv şaraitleri qattılaştırılğan ola bile. Bu aqta onıñ esirlikteki şaraitleri tasvirlengen "Boğdan kaje" blogunda yazıla.
Haberde Orta küzniñ 18-nde Bogdan Ziza ceza odalarından oda tipindeki müessisege avuştırılğanı aqqında aytıla.
"Men pek telükeli cinayetçi olaraq tanıdılar – qattı şartlarğa avuştırıldım ve altı ay PKT berildi. Evel yazğanım kibi, qaidelerini bozmamaq mümkün degil :) Er şey bir qarar, qayğırmaq içün sebepler yoq. Menim yaşayış şaraitlerim, aslında, apishaneden farq etmey, ve men soñki dört yıl içinde buña alıştım", — dep işandıra mektübinde dostlarını.
Boğdannıñ yañı tutuv şaraitleri bir sıra "tekrarlanğan tenbilerinden" soñ qoyuldı — o, 108 kün ŞİZO-da keçirdi. Onıñ aytqanına köre, apishane hadimleri resmiy sebeplerden oña bir qaç kere yañı cezalar bergenler ve onıñ ŞİZO-da qaluvını uzatqanlar.
Zizanıñ qorantası bu malümatnı daa tasdıqlamadı. Rusiye akimiyeti mabüsniñ tutulğan şartlarını açıqlamadı.
Rusiye FSB-si 27 yaşındaki Zizağa qarşı Rusiye Ceza kodeksiniñ 3o-ncı maddesiniñ 3-nci qısmına ("Cinayetke ıntıluv") ve 205-inci maddesiniñ 1-nci qısmına binaen ("Terroristik akt") cinaiy dava açtı.
Ziza Ukrayina prezidentine muracaat etip, onı ve Qırım ve Rusiye territoriyasında bulunğan diger ukrayinalı siyasiy mabüslerni deñişim cedvellerine kirsetmege rica etti.
2023 senesi iyünniñ 6-nda Rusiyeniñ Rostov-na-Donu Cenübiy okrugınıñ arbiy mahkemesi Bogdan Zizanı 15 yıl umumiy rejimli koloniyada qalmasına üküm etti. Rusiye prokuraturası Bogdan Ziza içün 18 yıl sert rejimli apis cezasını istedi.
2023 senesi sentâbrniñ 27-nde Moskva civarındaki Vlasiha şeerindeki Arbiy istinaf mahkemesi Zizağa çıqarılğan ükümni deñiştirmedi.
Keçken sene noyabrniñ başında, Ziza Rusiyeniñ Perm şeerindeki 29-nci apishanesinde bulunğanı aqqında haber etilgen edi.