Rusiye kontrolindeki Qırımnıñ Kirov rayon mahkemesi 64 yaşında nefacacını Rusiye ordusını "ayıplağanı" içün mahküm etti, dep haber ete mahkemeniñ matbuat hızmeti.
Qayd etilgenine köre, qadın "Odnoklassniki" içtimaiy ağındaki saifesinde trezub tasvirlengen yazılarnı yerleştirgen.
Rusiye mahkemesi oña beş kün memuriy apis cezasını ve 35 biñ ruble para cezasını berdi.
Qayd etilgenine köre, mahkeme oturışında o qabaatını tanığan.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusını "ayıplağanı" içün memuriy ve cinaiy mesüliyetke çekile.
Rusiye Federatsiyasında tam miqyaslı istilâ başlağan soñ, Rusiye ordusınıñ "diskreditatsiyası" aqqında Memuriy cinayetler kodeksiniñ 20.3.3 maddesi kirsetildi. İnsanlar Rusiye-Ukrayina cenki aqqında malümat tarqatqanları ve Kremlniñ noqta-i nazarına zıt kelgen er angi fikir bildirgenleri içün taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.